Foto:elements.envato.com
Ulttyq ekonomika ministri Álibek Qýantyrovqa jańa tólem bastamasy boiynsha ata-ana balasynyń bolashaq qarjysyn basqara ala ma degen suraq qoiyldy, - dep habarlaidy Tengrinews.kz.
"Bul qarajat, iaǵni Ulttyq qordan túsetin investitsiialyq kiristiń 50 paiyzy balanyń menshiginde bolady. 18 jasqa, kámeletke tolǵan jigit nemese qyz bul qarajatty paidalanyp, bilim alýǵa nemese jyljymaityn múlik satyp alýǵa baǵyttai alady. Sondyqtan, bul jerde ata-ana týraly áńgime joq", - dedi ministr OKQ-da ótken baspasóz máslihatynda.
Sonymen qatar, ministr bala týǵan kezde balalarǵa arnalǵan shot avtomatty túrde ashylatynyn atap ótti.
"Qazirgi ýaqytta tiisti organdarmen birlese otyryp, onyń mehanizmi talqylanyp jatyr, biraq shot bala týǵan kezde avtomatty túrde ashylady. Qazirgi ýaqytta Qazaqstan azamaty sanalatyn balalarǵa avtomatty túrde esepshot ashylady, tikelei tiisti baza bar – ol Ádilet ministrligi bazasynan túsedi. Sonymen qatar, balalardyń esepshotyna salyq salý josparlanbaidy", - dep túsindirdi ol.
Qýantyrov bala kámeletke tolǵanǵa deiin turaqty turǵylyqty jerin aýystyrsa quqyǵy shektele me degen suraqqa da jaýap berdi.
"Azamat turaqty turýǵa kóshse de, biraq azamattyǵyn 18 jasqa deiin saqtasa, onda ol bul qarajatty paidalana alady", - dep túsindirdi ministr.
