Mańǵystaý oblysyna jumys saparymen kelgen QR Prezidentiniń kómekshisi, Ulttyq qoǵamdyq senim keńesiniń hatshysy Erlan Qarin bastaǵan qoǵamdyq senim keńesiniń bir top múshesin oblys ákimi Serikbai Trumov qabyldady, dep habarlaidy "Ult aqparat".
Óńir basshysy bilik pen qoǵam arasyndaǵy altyn kópirdiń qyzmetin atqaryp, «Halyq únine qulaq asatyn memleket» tujyrymdamasyn iske asyrýǵa zor úles qosyp júrgen keńestiń jumysyna sáttilik tiledi.
«Ulttyq qoǵamdyq senim keńesi - túitkildi máselelerdiń túiinin tarqatatyn, halyqtyń ozyq ideialary men usynystaryn bir arnaǵa toǵystyratyn alań. Alǵashqy kezeńde qyzmetin konsýltativti-keńesshi organ retinde bastap, búginde jańa reformalar usynatyn mańyzdy qurylymǵa ainalyp otyr. Bul baǵytta sizderdiń atqaryp júrgen jumystaryńyzǵa sáttilik tileimin», - dedi S.Trumov.
Sondai-aq, oblys ákimi keńes múshelerine óńirdiń áleýmettik-ekonomikalyq damýy men ózekti máselelerinen habardar etti.
Ulttyq keńestiń múshesi, belgili qoǵam qairatkeri Rasýl Jumaly Mańǵystaýdyń ózge óńirlermen salystyrǵanda qarqyndy damyp jatqanyn aitty. «Salystyrmaly túrde avtojoldardyń sapasy kóńil tolarlyq. Oblysta halyq sanynyń ósýi de – bul ómir sapasynyń jaqsarǵanynyń kórsetkishi. Týrizm salasyna da den qoiylyp jatyr eken. Osy tusta meniń usynysym bar. Mańǵystaýdy elimizdiń mádeni ortalyǵyna ainaldyrý qajet. Oǵan barlyq múmkindik bar»,-dedi R.Jumaly.
Al, «Adam quqyqtary hartiiasy» qoǵamdyq qorynyń atqarýshy direktory Jemis Turmaǵambetova sońǵy jyldary Aqtaýdyń jańarǵanyn tilge tiek etti.
«Aqtaýǵa osydan onshaqty jyl buryn kelgen edim. Kóp ózgeristi kórip kóńilim toldy. Men quqyqtanýshy bolǵandyqtan quqyq qorǵaý organdarynyń jumysymen tanystym. Júieli jumystar jasalǵan eken. Alaida, áli de tolyqtyratyn máseleler jeterlik»,- dedi Jemis Ótegenqyzy.
Erlan Qarin bastaǵan Ulttyq keńes músheleri jumys sapary aiasynda oblystyq qoǵamdyq keńes múshelerimen, ziialy qaýym ókilderimen jáne stýdenttermen kezdesý ótkizip, óńirdiń ózekti máselelerin talqylady.
Ulttyq keńes músheleri Mańǵystaý óńirinen soń jumys saparymen Soltústik Qazaqstan, Qaraǵandy, Shyǵys Qazaqstan jáne Túrkistan oblystaryna barady.
