Ońtústik Qazaqstan oblysynda «Ulttyq kiim - urpaqqa mura» taqyrybynda seminar-trening ótti. Oblystyq Ádet-ǵuryp jáne salt-dástúr ortalyǵy uiymdastyrǵan basqosýǵa óńirdegi ulttyq kiim óndiretin kásipkerler men dizainerler qatysty, dep habarlaidy QazAqparat tilshisi.
Elbasynyń «Bolashaqqa baǵdar: rýhani jańǵyrý» atty maqalasy aiasynda uiymdastyrylǵan sharada sóz alǵan jobalyq keńseniń jetekshisi Baqytjan Áshirbekov, ulttyq kiimniń árbir halyqtyń salt-dástúri men mádenietin aishyqtaityn qundy dúnie ekendigine toqtalyp ótti. Seminar-treningke qatysqan dizainerler men tigin sheberleri ulttyq kiim túrlerin búgingi zaman talabyna sai, kúndelikti turmysta kiiýge yńǵaily etip tigý máselesin kóterdi. Jastardyń estetikalyq talǵamyn, ulttyq kiim tarihyn zertteýge qyzyǵýshylyǵyn arttyrý ekenine toqtaldy. Sondai-aq, qazaqy kiimniń barsha symbaty men oiý-órneginde, árbir áshekeiinde halqymyzdyń tarihynyń, oi-dúniesiniń qaitalanbas kórinisi bar ekendigin halyqqa jetkizý máseleleri jóninde áńgime qozǵady. Osy maqsatta seminardy uiymdastyrýshylar «Ulttyq kiim - urpaqqa mura» atty jańa joba bastalǵanyn atap ótti.
«Qadirli qonaqty, el aǵalaryn syilaý, qadir tutý maqsatynda iyǵyna shapan jaýyp, iltipatymyzdy bildiremiz. Sońǵy ýaqytta ol toidyń ǵana sáni. Qurmetti azamattarǵa tilek barysynda ǵana jabamyz, sosyn sómkege salynady ne sandyqtyń túbine ketedi. Sonshalyqty qasietinen aiyrylǵandyǵy sol, shapan bes-alty toidy ainalyp ózińe qaita keledi. Sharany uiymdastyrýdaǵy maqsat kásipkerler, sheberler, tiginshi, dizainerlermen birlese otyryp, ulttyq kiimge degen qoǵamdyq sanany ózgertý. Qaitsek qundylyqty jańǵyrtamyz, kúndelikti zaman aǵymyna qarai ózgertýge bolatyn tustary bar ma? Halyqqa jańasha bir dúnieler usynýdy sizdermen aqyldasa otyryp sheshsek», - dedi óńirdegi qoǵamdyq sanany jańǵyrtý baǵdarlamasyn júzege asyrý jónindegi jobalyq keńestiń jetekshisi Baqytjan Áshirbekov.
Uiymdastyrýshylardyń aitýynsha, jobanyń qorytyndysy kelesi jyldyń qazan aiynda shyǵarylady. Oǵan deiin joba aiasynda túrli basqosýlar, nasihat jáne dáripteý sharalary, ulttyq kiimder festivali ótedi.
