Aqtaýdaǵy Tulpar School jekemenshik litseiinde áiel adamnyń eden jýýshynyń sý toly shelegin teýip jibergen videosy áleýmettik jelide tarady. Oqiǵaǵa qatysty Mańǵystaý oblysynyń Bilim basqarmasy arnaiy komissiia qurdy, dep habarlaidy ult.kz.
Áleýmettik jelide jariialanǵan videoda áieldiń tazalyq jumystaryn júrgizip júrgen qyzmetkerdiń sý toly shelegin aiaǵymen teýip jibergeni kórinedi.
Jeli qoldanýshylarynyń jazýynsha, bul áiel oqý orny direktorynyń jubaiy. Osy oqiǵaǵa bailanysty politsiiaǵa aryz túskeni de habarlandy.
Mańǵystaý oblysynyń Bilim basqarmasy jaǵdaiǵa bailanysty arnaiy komissiia qurylǵanyn málimdedi. Komissiia oqiǵanyń barlyq mán-jaiyn jan-jaqty zerdelemek.
Tekserý barysynda taraptardyń túsiniktemesi tyńdalyp, jaǵdaiǵa quqyqtyq jáne uiymdastyrýshylyq turǵydan baǵa beriledi. Onyń qorytyndysy boiynsha qoldanystaǵy zańnama aiasynda tiisti sharalar qabyldanady.
Bilim basqarmasy bul máseleni baqylaýda ustap otyrǵanyn habarlady.
Al oblystyq Politsiia departamenti oqiǵaǵa qatysty ázirge túsinikteme bergen joq.
