Búgin Ulttyq qoǵamdyq senim keńesiniń tórtinshi otyrysynda keńes múshesi Lázzat Qojahmetova kópbaly otbasylardyń baspana alýy máselesin kóterdi, dep habarlaidy QazAqparat.
«Turǵyn úi saiasaty salasynda bir mezette jeti memlekettik operator jumys isteidi eken. Biraq, osy ýaqytqa deiin baspana kezeginde turǵan adamdardyń tizimin ashyq jariialaityn respýblikalyq sait joq. Iaǵni kim kezekten úi aldy? Óz kezegimen alyp jatyr ma? Jemqorlyq faktileri oryn aldy ma? Osynyń barlyǵy ashyq túrde saitta kórinýi kerek. Byltyr úi alǵandar qazirdiń ózinde kezekte tur, kezek jańarmai jatyr», - dedi L. Qojahmetova.
Budan bólek, ol qazir Qazaqstanda 30 myńǵa jýyq kópbalaly otbasy baspana kezeginde turǵanyn jetkizdi.
«Olarǵa arendalyq baspana beredi. Biraq jalǵa beriletin páter muraǵa qaldyrylmaidy, atyna túspeitindikten, halyq ipoteka alyp, óziniń attaryna túsetin menshik úi bolǵanyn qalaidy. Buǵan bailanysty bizde Qazaqstanda «7-20-25», «5-10-20» degen baǵdarlamalar shyqty jáne olar óte jaqsy baǵdarlamalar dep sanaimyz. Alaida, osy baǵdarlamamen úi alýdyń óziniń qiyndyqtary bar. Máselen, osy eki baǵdarlama boiynsha tek jańa úilerge ǵana ipoteka beriledi. Jańa úilerdiń baǵasy qymbat, 15 mln teńgege bir bólmeli ǵana páter alýǵa bolady. Tórt-bes balasy bar otbasyǵa bir bólmeli páterdi 20 jylǵa ipotekaǵa alý tiimsiz», - dedi keńes múshesi.
Osy oraida, «5-10-20» baǵdarlamasymen ipotekany ekinshi naryqtaǵy, iaǵni arzan ári jóndeýden ótken úilerge berý usynysy aityldy.
