Aýyl ákimderiniń sailaýy eshbir stsenarige baǵynbaityn, erkin formatta ótti. Ulttyq qoǵamdyq senim keńesiniń múshesi Aleksandr Danilov 730 eldi mekenniń ákimin anyqtaǵan saiasi naýqanǵa osyndai baǵa berip otyr, dep habarlaidy QazAqparat.
«Sailaý is júzinde sátti ótti. Óitkeni basty nátije - daýys berýshilerdiń belsendiligi joǵary boldy. Qorytyndyny qarasaq, barlyq jerde jeńisi boljanǵan úmitkerlerdiń joly bola bermegen. «Bárine qarsymyn» degen baǵandy belgileý arqyly, úmitkerlerdiń eshbirine kóńili tolmaitynyn kórsetkender boldy. Endi bir jerde ózin-ózi usynǵandardyń joly bolyp jatty. Iaǵni halyq sondaǵy eldiń ýaiymy men múddesin jaqsy biletin adamdarǵa basymdyq berdi. Osylaisha turǵyndarǵa óz qalaýyn oryndap, paiymyn bildirýge tolyq jaǵdai jasaldy. Bul sailaý – kandidattardyń bári ózderin usyný arqyly sailanatyn majoritarlyq saiasi júieni qurýdyń alǵashqy qadamy», - deidi sarapshy.
Aleksandr Danilov keshegi sailaýdan birneshe qorytyndy shyǵarǵan.
«Birinshiden, partiialarǵa budan bylai belsendi bolý kerek. Olar endi sailaýlar arasynda burynǵydai qalyń uiqyǵa kete almaidy. Jyl saiyn, toqsan saiyn kúresip, kandidattardy baqylap, aimaqtarda yqpalyn arttyrý kerek. Bul satydaǵy sailaý turaqty túrde ótkiziledi jáne ár jyl saiyn deńgeii óse beredi. 2024 jyly biz aýdan ákimderin sailaýǵa kóshemiz. Búgin sailanǵandar aýyl ákimderiniń ishinen sol kezde aýdan ákimdigine úmitkerler shyǵýy múmkin. Osylaisha taza eńbektiń arqasynda áleýetin kórsetip, saiasi mansabyn qura alady. Qalai desek te, el sailaǵan ákim joǵarydan taǵaiyndalǵan ákimnen ózgeshe bolady. Oǵan únemi el aldynda ár qadamy úshin esep berip, biýdjetti qalai durys jumsaitynyn túsindirip otyrý kerek. Osylaisha biz saiasi júieni sapaly etemiz. Daýys berý kezinde zań buzý az bolǵanyna qýandym», - deidi Ulttyq keńes múshesi.
Onyń paiymynsha, sailanǵan ákimder isten góri sózge áýes bolsa, óz oryndaryn uzaq saqtap tura almaidy.
«Aýyldaǵy halyqtyń qalalyqtarǵa qaraǵanda sailaýǵa belsendi qatysatynyn túsiný kerek. Adamdar bul joly sonaý ortalyqtaǵy bilik ókilderin emes, ózderiniń kóz aldyndaǵy bilikti tańdady. Onymen kúnde sóilesip, suraq qoia alady. Bir sózben aitqanda adamdar naqty problemalardyń sheshilý jolyna daýys berdi, óz aýylynyń, aýyldyq okrýginiń bolashaǵyn tańdady. Sondyqtan sailaýshylardyń belsendi bolatyn jóni bar. Bul nátije tabiǵi dep aitýǵa negiz bar», - dedi Aleksandr Danilov.
