Petitsiialardy deńgeileri boiynsha aýdandyq, óńirlik, jalpyulttyq dep bólý kerek. Ulttyq qoǵamdyq senim keńesiniń saiasi reformalar jónindegi tobynyń atynan bul usynysty búgingi Keńes otyrysynda Maksim Spotkai aitty, dep habarlaidy QazAqparat.
«Internet arqyly ótinish berý mehanizmi týraly: petitsiialardy deńgeileri boiynsha aiqyndaý kerek. Olardy aýdandyq, óńirlik, jalpyulttyq dep bólýge bolady. Ásirese, memlekettik organdar petitsiiany nazarǵa alýy úshin qajetti qol jinaý sanyn naqtylaý kerek. Mysaly aýdandyq deńgeidi 1 myń, aimaqtyq deńgeidi 10 myń, al jalpyulttyq deńgeidi 100 myń qol etip belgileýge bolady», - dedi Maksim Spotkai Memleket basshysynyń qatysýymen ótken Ulttyq qoǵamdyq senim keńesiniń tórtinshi otyrysynda.
Sonymen qatar Ulttyq keńes múshesi bul petitsiialar odan ári qaralýy kerektigin de aityp ótti.
«Bul petitsiialar ary qarai qalai qaralýy kerek?» degen suraq týyndap tur. Biz aýdandyq petitsiialardy óńirlik deńgeidegi máslihattar, al jalpyulttyq deńgei – tiisti zań qabyldanýy úshin Parlamentte qaralýy qajet. Sol baǵytta qoǵamdyq tyńdaýlardy uiymdastyrǵan jón», - dedi ol.
Eske sala ketsek búgin Memleket basshysy Qasym-Jomart Toqaevtyń qatysýymen Ulttyq qoǵamdyq senim keńesiniń tórtinshi otyrysy ótti. Shara barysynda memlekettik basqarý reformasy, áleýmettik jáne ekologiialyq máselelerdi sheshý, balalardyń quqyqtaryn qorǵaý, erekshe muqtajdyǵy bar adamdardy qoldaý máseleleri qaraldy.
