«Atameken» ulttyq kásipkerler palatasyn transformatsiialaý jónindegi jumys toby apta sońyna deiin qurylady, dep habarlaidy uiymnyń baspasóz qyzmeti.
Ulttyq palata buǵan deiin qyzmetin reformalaýǵa daiyn ekenin habarlaǵan bolatyn. Ótken aptada elimizdiń túkpir-túkpirinen kásipkerler «Atamekendi» transformatsiialaýǵa qatysty usynysyn joldady. Al senbide basqarma músheleri óńirlik biznes pen salalyq qaýymdastyq ókilderin tyńdady. Endi jumys toby barlyq usynysty qarastyrady. Keiin olar Palatanyń kezekten tys Sezine shyǵarylady.
Talqylaý barysynda qatysýshylar jumys tobyna 17 óńirlik keńesten 2 úmitker jáne 198 qaýymdastyqtyń múddesine ókildik etetin salalyq komitetterden 2 úmitker kirýi tiis dep sheshti.
Osy aptanyń sońyna deiin óńirlik keńester men komitetter óz alańynda otyrys ótkizip, atalǵan kandidattardy anyqtap, alda kele jatqan Sezd kún tártibine usynys berýi kerek. Jumys tobynyń quramy UKP saitynda jariialanady.
Osylaisha, dúisenbi, 31 qańtarda jumys toby biznesten túsken barlyq usynysty talqylaýǵa kirisedi. Otyrystardy ashyq, áleýmettik jelilerde tikelei transliatsiia arqyly jáne jurtshylyqty únemi habardar etip ótkizý josparlanyp otyr.
Bir ai ishinde jumys tobynyń músheleri eki baǵyt: Ulttyq palatany reformalaý jáne biznes-qoǵamdastyqtyń problemalary boiynsha talqylaý júrgizýi tiis. Transformatsiialaý boiynsha usynystar UKP-da akkredittelmegen, biraq onyń qyzmetin jaqsartýǵa qatysýǵa niet bildirgen kásipkerler men biznes-birlestikterden de qabyldanady. Jumys tobynyń qorytyndysy boiynsha kezekten tys Sezdiń kún tártibi qurylady.
Búgin «Atameken» joǵary basqarý organyn – Sezdi shaqyrý rásimin bastady. Sezd 17-18 naýryzda ótedi dep kútilýde.
