«Atameken» ulttyq kásipkerler palatasy jańa prezidiým tóraǵasyn sailaýǵa qatysty málimdeme jasady, dep habarlaidy QazAqparat.
«Búgin Timýr Qulybaevtyń «Atameken» UKP tóralqa tóraǵasy qyzmetindegi ókilettigi óz erkimen toqtatyldy. Ulttyq palata zań normalaryna sáikes qurylǵan barlyq jumys istep turǵan basqarý organdary (tóralqa men basqarma, óńirlik keńester men óńirlik palatalar) shtattyq rejimde jumys istei beredi. Qazir Memleket basshysynyń tapsyrmasy boiynsha Úkimet ulttyq kásipkerler palatasymen birlesip, tártipsizdikterden zardap shekken bizneske keltirilgen zalaldy óteý boiynsha jumysty bastady» delingen habarlamada.
Palatanyń málimetinshe, pandemiia qaita kúsheiip keledi, onyń saldarymen kúres basty nazarda bolady.
«Biz úshin otandyq biznes lokdaýn jáne qatań karantinsiz jumys isteýin jalǵastyrýy mańyzdy. Memleket basshysynyń 2022 jylǵy 11 qańtarda belgilegen tapsyrmalaryn oryndaý úshin úlken jumys atqarý kerek. Tóralqa tóraǵasyn sezd sailaitynyn eskere otyryp, tóralqanyń kezekti otyrysynda onyń músheleri tóraǵa mindetin ýaqytsha atqarýshynyń kandidatýrasyn aiqyndaidy. Biz «Atameken» UKP sailaý júiesin nyǵaitý jumysyn jalǵastyramyz. 2020 jyly óńirlik keńesterde sailaý ótkizildi. Jaqyn arada UKP basqarmasy biznes-qoǵamdastyqtyń talqylaýyna burynnan kele jatqan másele – tóralqa janyndaǵy salalyq komitetteriniń múshelerin tiisti salalardyń kásipkerleri etip sailaý tártibin shyǵarady» dep málim etti palata.
Nátijesinde 2022 jyldyń kúzinde kezekti sezge qarai sezd jáne tóralqanyń jańa delegattar quramy jańarady.
Basqarýdyń joǵarǵy organy retinde sezd óz ýákilettigi aiasynda tóralqa tóraǵasy men quramy, sondai-aq basqarma quramyna qatysty sheshimin shyǵarady.
