Foto: UǴA
Kúni keshe Ulttyq ǵylym akademiiasyn erikti túrde taratýǵa qatysty tarihi sheshim qabyldandy, dep habarlady UǴA baspasóz qyzmeti.
27 naýryzda Almatyda 2003 jyly qoǵamdyq uiym retinde qurylǵan Ulttyq ǵylym akademiiasynyń jalpy jinalysy ótti.
"Jiyn barysynda biraýyzdan Ulttyq ǵylym akademiiasynyń akademikterin Prezident janyndaǵy QR UǴA (Joǵary ǵylymi uiym) quramyna transformatsiialaý "QR Ulttyq ǵylym akademiiasy" respýblikalyq qoǵamdyq birlestigin uiym Jarǵysynda kórsetilgen barlyq talaptardy saqtai otyryp erikti túrde taratýǵa qatysty tarihi sheshim qabyldandy. Jalpy jinalysqa qatysqan akademikter eldiń ǵylymi áleýetin bir ortalyqqa shoǵyrlandyrýdy kózdegen azamattyq ustanymǵa qoldaý bildirdi", - dep habarlady UǴA baspasóz qyzmeti.
Bul sheshim Prezident janyndaǵy Ulttyq ǵylym akademiiasynyń qyzmetine uqsas fýnktsiialardyń qaitalanýyn boldyrmai, ony jańa formattaǵy biregei ári ornyqty ǵylymi ortalyq retinde eki akademiia ǵalymdarynyń ǵylymi potentsiialyn biriktirip nyǵaitýǵa múmkindik beredi delingen.
Prezident janyndaǵy Ulttyq ǵylym akademiiasy 2023 jyly qurylǵan bolatyn. Sol kezden bastap ǵylymdy turaqty qarjylandyrý qamtamasyz etilip, akademikterdi ashyq sailaý isi jolǵa qoiyldy. Akademiia memlekettik mártebege ie, qazirgi tańda ol ǵylymdy strategiialyq turǵyda damytýdy, basym baǵyttardy ǵylymi-taldamalyq turǵyda qoldaýdy, sondai-aq halyqaralyq akademiialyq qaýymdastyqpen ózara is-qimyldy qamtamasyz etip keledi.
2024 jyly qabyldanǵan "Ǵylym jáne tehnologiialyq saiasat týraly" Zańǵa sáikes, Akademiiaǵa Joǵary ǵylymi uiym mártebesi berildi. Aldaǵy ýaqytta ǵylymi áleýetterin biriktirgen ǵylym akademiiasy halyqaralyq deńgeide iri ǵylymi jańalyqtarǵa qol jetkizýge múmkindik aldy, 2026 jyly 1946 jyldan bastaý alatyn Qazaqstannyń ulttyq akademiiasynyń 80 jyldyq mereitoiy kútilýde.
Buǵan deiin Ulttyq ǵylym jáne tehnologiialar keńesiniń otyrysynda Memleket basshysy atap ótkendei, "ǵylymy myqty eldiń memleketi de qýatty bolady. Ǵylymsyz el – qurdymǵa ketedi. Al ǵylymy ozyq el kez kelgen daǵdarysty eńsere alady".
Salalyq ministrlik qurylǵan sátten bastap Memleket basshysy ǵylymnyń ekonomikaǵa yqpalyn kúsheitýdi, ony innovatsiialarmen tyǵyz bailanystyrýdy, sondai-aq naqty is tyndyrýǵa baǵyttalǵan ǵylymi saiasatty jolǵa qoiýdy tapsyrǵan bolatyn.
"2023 jyly Joǵary bilim men ǵylymdy damytýdyń 2023–2029 jyldarǵa arnalǵan tujyrymdamasy jáne "Ǵylym jáne tehnologiialyq saiasat týraly" jańa Zań qabyldandy. Sonyń arqasynda jas ǵalymdardy qoldaýǵa, ýniversitettik ǵylymdy damytýǵa, ǵylymi jańalyqtardy kommertsiialandyrýǵa jáne óńirlerdegi ǵylymi infraqurylymdy nyǵaitýǵa airyqsha kóńil bólinýde.
Sondyqtan qoǵamdyq birlestiktiń Jalpy jinalysynda qabyldanǵan búgingi sheshim – ǵylymi sabaqtastyqty saqtaý, ǵylymi qaýymdastyqtyń aýyzbirligin arttyrý, ǵylym men óndiris arasyndaǵy bailanysty kúsheitý jolyndaǵy mańyzdy qadam", - delingen habarlamada.
