Pavlodarda Ulttyq Gvardiia arnaiy bólim jaýyngerleriniń kúreń beretti taǵý quqyǵyn ielenýge arnalǵan kvalifikatsiialyq synaqtary aiaqtaldy, dep habarlaidy "Ult aqparat" Ulttyq Ulannyń «Shyǵys» óńirlik qolbasshylyǵy baspasóz qyzmetiniń basshysy Baǵdat Amangeldige silteme jasap.
Biyl kvalifikatsiialyq synaqqa qatysýǵa arnaýly jasaqta kem degende 3 jyl qyzmet etken 500 áskeri qyzmetker niet bildirdi. Olardyń 47-si ary qarai ótýge ruqsat aldy.
Úsh kezeńnen turatyn kvalifikatsiialyq synaqtan ótý ońaiǵa soqqan joq. Jaýyngerler fizikalyq jáne atys daiyndyǵy boiynsha normativter tapsyrdy.
Sońǵy kúni 14 úmitker 12 shaqyrymdyq jedel marshty baǵyndyrýǵa shaqty. Jaýyngerler belgili bir baǵyt boiynsha sýly, balshyqty jerlerden ótti.
Alaida jedel marshtan 14 úmitkerdiń 12-si ǵana kelesi synaqqa ótkizildi.
Úmitker Aslanbek Nákishev kúreń beretti taǵý mártebesin ielený úshin 6 jyldan beri baǵyn synap kelgen. Biyl aiy ońynan týyp otyr.
«Qiyn boldy. Ár normativti joǵary deńgeide ótýiń kerek, sondyqtan ýaiymdai bastaisyń. Tipti qoian-qoltyń urystyń sońǵy kezeńinde qulap jatsam da, berilmeimin dep, ornymnan turyp, sońyna deiin kúrestim», - deidi Aslanbek.
Biyl biliktilik synaqtary jańa formatta ótkenin atap ótý kerek. Olar praktikalyq normativterdi oryndaý ýaqytyn qysqartý arqyly bir izge salyndy. Osylaisha búginde burynǵy 75 shaqyrym qashyqtyq 12 shaqyrymǵa qysqartyldy. Alaida tapsyrylatyn normativter sany eki ese ósti.
«Ár adam aldyna qol jetkizgisi keletin maqsattar qoiady jáne búgin 12 jaýynger bul tapsyrmany oryndady. Alaida bul ótpei qalǵandar mindetterin atqara almaidy degen sóz emes. Bul adamdar kún saiyn ishki ister, ulttyq qaýipsizdik organdarymen birlesip qylmysqa qarsy kúres júrgizedi», - dedi Ulttyq Gvardiia bas qolbasshysy general-maior Albert Matkárimov.
Búginde Qazaqstan Respýblikasy Ulttyq Gvardiia qatarynda kúreń beretti taǵý quqyǵyna ie 150 áskeri qyzmetker jumys atqarýda.
