QR Ulttyq ekonomika ministri Rýslan Dálenov ózi basqaryp otyrǵan vedomstvoǵa Mádina Ábilqasymovanyń kelýine qatysty pikir bildirdi, dep habarlaidy QazAqparat tilshisi.
«Barlyq vitse-ministrler Úkimet sheshimimen taǵaiyndalady. Mádina Ábilqasymova osyǵan deiin Ulttyq ekonomika ministrliginde qyzmet etken bolatyn, iaǵni halyqaralyq blokpen ainalysty. Endi jańa qyzmetinde de osy baǵytqa jaýapty bolady. Meniń aldyma birqatar mindetter (Úkimet tarapynan - avt.) qoiyldy, sáikesinshe jumystyń jemisti bolýy úshin ózimniń orynbasarlarymnan talap etemin. Búginde meniń bes orynbasarym bar», - dedi R. Dálenov Májilistiń jalpy otyrysynan keiin tilshiler saýalyna jaýap bere otyryp.
Sonymen qatar, ministr ýaqyttyń tyǵyzdyǵynan jańa taǵaiyndaýǵa bailanysty áleýmettik jelidegi pikirlerge qaraýdyń reti bolmaǵanyn aitty.
«Men qaramaǵymdaǵy adamdardan jumystyń oryndalýyn talap etemin. Olardyń eńbekaqysy arnaiy kestemen retteledi, vitse-ministrdiń eńbekaqysy ministrge qaraǵanda tómendeý», - dedi Rýslan Dálenov.
Budan buryn habarlanǵandai, QR Úkimetiniń Qaýlysymen Mádina Erasylqyzy Ábilqasymova QR Ulttyq ekonomika birinshi vitse-ministri bolyp taǵaiyndaldy.
Osyǵan deiin ol QR Eńbek jáne halyqty áleýmettik qorǵaý ministri laýazymynda bolǵan edi.
