Qazaqstanda qańtar aiynda ótetin UBT bastaldy. Qatysýshylardan 104 myńǵa jýyq ótinim tústi. Ulttyq biryńǵai testileý 2022 jyldyń 22 aqpanyna deiin jalǵasady. Osy ýaqytqa deiin UBT-ny 10 qańtar men 10 aqpan aralyǵynda ótkizý josparlanǵan bolatyn. Alaida, elde tótenshe jaǵdai rejiminiń engizilýine bailanysty merzimi keiinge shegerildi. Qajettiligine qarai testileýge qosymsha kúnder engizildi, dep habarlaidy BǴM baspasóz qyzmeti.
Biyl ministrlik talapkerlerge qolaily jaǵdai jasaý úshin, sondai-aq testileý tapsyrý protsesiniń ashyqtyǵy men transparenttiligin kúsheitý úshin birqatar ózgeris engizdi.
«Mysaly, erekshe bilim berý qajettilikteri bar túlekterge 2022 jyly qosymsha ýaqyt berildi. Kórý, estý, tirek-qimyl apparatynyń fýnktsiialary buzylǵan talapkerlerge testileý tapsyrmalaryn oryndaý úshin negizgi 240 minýttan bólek qosymsha 40 minýt beriledi. Iaǵni, olar UBT-ny 4 saǵat 40 minýt ishinde, basqalarǵa qaraǵanda uzaǵyraq tapsyra alady. Sonymen qatar erekshe qajettilikteri bar talapkerlerge arnalǵan tapsyrmalardyń mazmunyna da ózgerister engizildi. Olar úshin sýretsiz, syzbalarsyz jáne diagrammalarsyz test nusqalary jasaldy. Bul ózgerister UBT tapsyrýdy aitarlyqtai jeńildetedi», – dep atap ótti QR BǴM Ulttyq testileý ortalyǵynyń direktory Rýslan Emelbaev.
Testileý «1 kompiýter - 2 kamera - 1 testilenýshi» qaǵidaty boiynsha júrgiziledi. Oqýǵa túsýshiniń test tapsyrý ornynda negizgi kameradan basqa, testilenýshiniń dybysyn jazý jáne qozǵalysyn tirkeý úshin aldyńǵy veb-kamera ornatylady. Frontaldy veb-kamera talapkerdiń jeke basyn sáikestendirýge jáne UBT kezinde bógde adamdardyń kirýin boldyrmaýǵa múmkindik beredi. Sondai-aq bul qaǵidat emtihan tapsyrý barysyna baqylaý júrgizý jáne testileýdiń ashyqtyǵyn qamtamasyz etý úshin qajet.
Tapsyratyn pánder sany ózgergen joq – eki beiindi jáne úsh mindetti pán qamtylady. Test tapsyrmalaranyń sany – 120. Onyń ishinde Qazaqstan tarihy boiynsha – 15, matematikalyq saýattylyq boiynsha – 15, oqý saýattylyǵy – 20 jáne eki beiindi pánnen 35 tapsyrmadan beriledi. Testileýdi ótkizý ýaqyty – 4 saǵat (240 minýt). UBT nátijesi boiynsha talapkerler eń joǵary 140 ball jinai alady.
Testileýge kirer kezinde qolmen tekseretin jáne ramalyq metall izdegishter qoldanylady. Bul talapkerlerdiń qaýipsizdigi úshin, erejelerdi buzýdyń jáne tyiym salynǵan zattardy (telefondar, shpargalkalar jáne t.b.) alyp ótýdiń aldyn alý úshin de qajet. Qatysýshylardan tyiym salynǵan zattar tabylǵan jaǵdaida testileý avtomatty túrde toqtatylady.
Testileý kezinde mobildi jáne radioelektrondyq bailanys signaldaryn basatyn qurylǵylar paidalanylady. Ol aýditoriianyń (kompiýterlik synyptyń) jáne beinebaqylaý kameralarynyń aýdanyna bailanysty jumys isteidi.
UBT-2022 aiaqtalǵannan keiin kúntizbelik jyldyń sońyna deiin beinejazbalarǵa taldaý júrgiziledi. Tyiym salynǵan zattardy paidalaný jáne erejelerdi buzý faktileri anyqtalǵan jaǵdaida, oqýǵa túsýshiniń UBT nátijeleri joiylady.
Aita ketsek, qańtar aiyndaǵy UBT qorytyndysy boiynsha aqyly negizde oqýǵa bolady. Túlekter jazǵy testileý negizinde grantqa úmitker bola alady.
Sondai-aq barlyq sanitarlyq-epidemiologiialyq talap qatań saqtalady.
