Ulttyq bank 2020 jylǵy infliatsiia boljamyn qaita qarady.
Ulttyq banktiń baspasóz qyzmetiniń habaraýynsha, jyldyq infliatsiia 2020-2021 jyldarǵa belgilengen nysanaly dálizden 4-6% joǵary bolyp qalyptasady. 2020 jylǵy mamyrda jyldyq infliatsiia 6,7% (2020 jylǵy sáýirde 6,8%) boldy.
«Infliatsiialyq protsester Qazaqstanda jáne saýda áriptes elderinde karantin sharalarynyń yqpalymen, sondai-aq teńge baǵamynyń álsireýi jáne ony ishki baǵalarǵa kóshirý arqyly qalyptasady», – dep habardady Ulttyq bank.
Ulttyq baktiń málimetinshe, infliatsiialyq protsester serpinine 2016 jylǵy qazannan bastap eń joǵary mánge qol jetkizip, mamyrda jyldyq kórsetýde 10,7%-ǵa qymbattaǵan azyq-túlik taýarlaryna baǵanyń ósýi negizgi úles qosýyn jalǵastyrýda. Azyq-túlik infliatsiiasyn jedeldetý karantin sharalaryn saqtaǵan jaǵdaida shikizat pen ónimdi jetkizý tizbeginiń buzylýy nátijesinde jekelegen taýarlarǵa degen joǵary suranysqa, sol siiaqty shekteýli usynysqa da bailanysty boldy. Azyq-túlik emes infliatsiia serpini qalypty kúiin saqtap, jyldyq ósim 5,3% boldy.
«Ulttyq Bank aǵymdaǵy jyldyń sońyna deiin infliatsiia boiynsha boljamdy qaita qarady. Qazaqstan Respýblikasynyń 2020-2024 jyldarǵa arnalǵan áleýmettikekonomikalyq damý boljamyn ázirleý sheńberinde munai baǵasynyń stsenariiin barreline 20-25 AQSh dollarynda boljap, Úkimet daǵdarysqa qarsy jospardyń maqsattary úshin bazalyq retinde qaraǵan infliatsiia aǵymdaǵy jyldyń sońyna qarai 9-11% deńgeiinde baǵalandy. Munai naryǵy boiynsha naqtylanǵan baǵalaýlarǵa jáne 2020 jyly orta eseppen bir barrel úshin 35-40 dollar deńgeiinde munai qunyn boljaityn Ulttyq Banktiń bazalyq stsenariiine sáikes jyldyq infliatsiia 2020 jyldyń qorytyndysy boiynsha 8,0-8,5% deńgeiinde boljanýda», – delingen habarlamada.
Naýryzda COVID-19 pandemiiasymen kúresý úshin elde tótenshe jaǵdai men karantin sharalaryn engizý ekonomikalyq belsendiliktiń aitarlyqtai nasharlaýyna sebep boldy. UEM SK derekteri boiynsha, 2020 jylǵy qańtar-sáýirde kóterme jáne bólshek saýda kóleminiń sáýirde 34,8%-ǵa, kólik qyzmetteriniń – 36,6%-ǵa tómendeýi nátijesinde IJÓ jyldyq kórsetýde 0,2%-ǵa qysqardy. Syrtqy jáne ishki suranystyń tómendeýi aiasynda óńdeýshi ónerkásiptiń jekelegen sektorlarynda iskerlik belsendiliktiń baiaýlaýy baiqaldy. Bul rette, qyzmetkerlerdi qashyqtyqtan jumysqa aýdarý jáne onlain-oqytýdy engizý bailanys qyzmetteri, jetkizý qyzmetteri kóleminiń ósýine alyp keldi.
2020 jyly Qazaqstannyń saýda áriptes elderiniń ósý perspektivalary boiynsha baǵalar teris bolyp qalýda. Consensus Economics boljamdaryna sáikes, 2020 jyly EO ekonomikasy 7,7%-ǵa, Resei 4,1%-ǵa qysqarady, Qytai ekonomikasy 1,4%-ǵa deiin baiaýlaidy. 2021 jyly barlyq áriptes elderde kórsetkishterdiń kúrt qalpyna kelýi kútilýde, atap aitqanda, EO ekonomikasy 6,2%-ǵa, Resei ekonomikasy 3,8%-ǵa, Qytai ekonomikasy 8,1%-ǵa ósedi.
Munai naryǵyndaǵy ahýal birtindep jaqsaryp keledi, alaida baǵa deńgeii birshama tómen, al baiqalǵan serpin áli de turaqsyz. Brent markaly munaidyń ortasha ailyq baǵasy 2020 jylǵy mamyrdyń qorytyndysy boiynsha bir aida 20,7%-ǵa óskenin kórsetip, bir barrel úshin 32,4 AQSh dollaryn qurady.
