1 qazanda Ulttyq bank nominaldyq quny 20 000 teńgelik banknotty ainalymǵa shyǵarady, - dep habarlaidy "Ult aqparat" vedomstvonyń baspasóz qyzmetine silteme jasap.
"Banknot ainalymdaǵy aqsha belgilerimen biryńǵai stilde jasalǵan. Mysaly, bet jaǵynda kóbine tiginen oryndalǵan beineler, syrt jaǵynda kóldeneń oryndalǵan beineler ornalasqan. Dizainy nominaldyń golografiialyq beinesi tiginen ornalasqan metalsyzdandyrylǵan jolaqty qoldana otyryp jasalǵan", - delingen habarlamada.
Banknottyń 25 qorǵanysh elementi bar, mólsheri 155h79 mm jáne sur túske basymdyq berilgen.
Bet jaǵynda Qazaqstan Respýblikasynyń Memlekettik rámizderi, "Qazaq Eli" monýmenti, "Máńgilik El" saltanat qaqpasy, "Basqur" qazaq ulttyq oiý-órneginiń fragmenti jáne Táýelsizdik jyldaryn bildiretin "30" sany beinelengen.
Banknottyń ekinshi betinde Astananyń jáne Aqorda rezidentsiiasynyń panoramalyq kórinisin kórýge bolady.
Nominaly 20 000 teńgelik jańa dizaindaǵy banknot óz qunyna sai Qazaqstan Respýblikasynyń búkil aýmaǵynda tólemderdiń barlyq túri boiynsha qabyldaýǵa, sondai-aq eldegi bankterde banktik shottarǵa esepke alýǵa jáne aýdarýǵa, usaqtaýǵa, aiyrbastaýǵa jatady.
Jańa kýpiýra "Qazaq Eli" seriiasymen usynylǵan qazirgi tańda ainalymda bar 500, 1 000, 2 000, 5 000 jáne 10 000 teńgelik nominaldaǵy banknottardyń qataryn tolyqtyrady, delingen UB habarlamasynda.
