Foto: egemen.kz
Qazaqstan Ulttyq bankiniń tóraǵasy Timýr Súleimenov eldegi valiýta aiyrbastaý pýnkterinde valiýtany satyp alý men satý baǵamdarynyń arasyndaǵy jańa shekterdi engizý týraly sheshimge qatysty óz pikirin bildirdi, dep habarlaidy Ult.kz.
Jýrnalister Súleimenovten: “Qazaqstanda aiyrbastaý pýnktterinde valiýta satyp alý jáne satý arasyndaǵy shek engizý josparlanǵan. Bul básekelestikti shekteý bolmai ma, kerisinshe, ekonomikanyń dollarlanýyna ákelmei me?" – dep surady.
Suraqtarǵa jaýap bere otyryp Ulttyq bank tóraǵasy sońǵy sheshim qabyldanbaǵanyn, qaziri ýaqytta qaýly qoǵamdyq talqylaýda ekenin aitty.
"Sizder bilesizder, bizde normativtik-quqyqtyq aktilerdi qabyldaý protsesi aitarlyqtai kúrdeli. Bul ashyqtyqty qamtamasyz etý jáne keri bailanys alý múmkindigi úshin jasalǵan. Iá, osyndai limit engizýdi josparlap otyrmyz. Bul norma 2023 jylǵa deiin qoldanysta boldy, biraq 2023 jyly kýrs turaqtanǵan kezde Ulttyq bank bul normany uzartpaý týraly sheshim qabyldady.
Qazirgi ýaqytta, ókinishke qarai, jahandyq valiýta naryqtaryndaǵy qubylmalylyq joǵary bolyp qalyp otyrǵanyn, al elimizdegi valiýta naryǵynda aitarlyqtai turaqsyzdyq saqtalyp otyrǵanyn kórip otyrmyz. Sondyqtan bul spredti belgileý qajet degen qorytyndyǵa keldik", – dedi ol.
Timýr Súleimenovtiń sózine sensek, bul sheshim básekelestikti shektemeidi, óitkeni bul barlyq aiyrbastaý pýnktterine birdei qoldanylatyn ámbebap talap.
"Elimizde shamamen 2 myń aiyrbastaý pýnkti bar, olardyń barlyǵy jańa erejeler boiynsha jumys isteitin bolady. Eger biz ártúrli aiyrbastaý pýnktterine ártúrli sharttar belgilesek, bul básekelestikti shekteýge ákelýi múmkin edi. Alaida jańa erejeler barlyǵyna birdei qoldanylatyndyqtan, bul jerde básekelestikti shekteý joq dep sanaimyz.
Qara naryqqa qatysty máselelerge kelsek, joq, 7 teńge deńgeiinde belgilengen spred aiyrbastaý pýnktteriniń óz qyzmetin qamtamasyz etýine jetkilikti dep esepteimiz. Bul tásil sharýashylyq sýbektileri úshin qosymsha alańdaýshylyq pen turaqsyzdyqtyń aldyn alýǵa kómektesedi", – dedi Ulttyq bank tóraǵasy.
