Qazaqstan Ulttyq banki tóraǵasynyń orynbasary Oleg Smoliakov "Tsesnabank" AQ-tyń qarjylyq turaqtylyǵyna bailanysty túsinikteme berdi, dep habarlaidy "Ult aqparat" Ulttyq banktiń baspasóz qyzmetine silteme jasap.
«Úkimet pen Qazaqstan Ulttyq banki iske asyrǵan sharalar kesheni jáne «Tsesnabank» AQ-qa jańa investor tartý «Tsesnabank» AQ-ty qalypqa keltirýge múmkindik berdi. Qazirgi ýaqytta bankte Qazaqstan Ulttyq bankiniń eń tómengi talaptarynan asatyn kapitaldandyrý jáne ótimdilik kórsetkishteri bar. «Tsesnabank» AQ ótimdiligi joǵary aktivterdiń eleýli qoryna ie, bul bankke klientter men kreditorlar aldyndaǵy óz mindettemelerin tolyq kólemde oryndaýǵa múmkindik beredi», - deidi O.Smoliakov.
Ulttyq banktiń resmi saitynda jariialanǵan túsiniktemege súiensek, bank mindettemeleriniń kópshiligi bankti qorlandyrýdyń turaqty bazasymen qamtamasyz ete otyryp, uzaq merzimdi sipatqa ie. Buny bank obligatsiialarynyń depozitterge araqatynasy kórsetip otyr. Ol júie boiynsha 20 paiyzdan aspaityn ortasha kórsetkishten birneshe ese artyq.
«Sonymen qatar, «Tsesnabank» AQ kredit portfeliniń qunsyzdanýynan bolǵan barlyq yqtimal shyǵyndardy óteý úshin jetkilikti somaǵa qosymsha proviziia qalyptastyrdy. Sondai-aq «Tsesnabank» AQ buryn Qazaqstan Ulttyq banki usynǵan turaqtandyrý qaryzyn tolyq kólemde ótedi. Osylaisha, «Tsesnabank» AQ tolyq qalypqa keltirilip, ádettegi rejimdegi qyzmetin júzege asyrýdy jáne klientteri men salymshylary aldyndaǵy mindettemelerin oryndaýdy jalǵastyrady», - deidi Ulttyq bank ókili.
