Ulttyq bank tóraǵasy Ǵalymjan Pirmatov teńgeniń qubylmalyq qaýpiniń saqtalatynyn málimdedi, - dep habarlaidy Tengrinews.kz.
Ol sáýirde álemdik qarjy naryǵyndaǵy qubylmalyqqa qaramastan, teńge bir dollarǵa 445,62 teńgege nemese 4,6 paiyzǵa qymbattaǵanyn eske saldy.
"Sáýirde shetel valiýtasyna suranys aitarlyqtai tómendedi. Qazaqstan qor birjasyndaǵy saýda-sattyqtyń ortasha kúndik kólemi 179 million dollardan 92 million dollarǵa deiin azaidy. Valiýta naryǵyna kvazimemlekettik sektor sýbektileriniń valiýtalyq túsimdi satýy qoldaý kórsetti, olar shamamen 253,2 million dollar boldy", - dedi Pirmatov Úkimet otyrysynda.
Ulttyq banktiń málimetinshe, sáýirde Ulttyq qordan respýblikalyq biýdjetke aýdarymdardy qamtamasyz etý úshin shetel valiýtasyn satý 168,3 million dollar bolǵan. Ulttyq qordan túsken satý úlesi jalpy saýda kóleminiń 8,7 paiyzyn quraǵan.
"Sáýirde ishki valiýta naryǵyndaǵy jaǵdaidyń turaqtanýy aiasynda Ulttyq bank valiýtalyq interventsiialardy júrgizgen joq. Qysqa merzimdi perspektivada geosaiasi jaǵdaidyń belgisizdigine bailanysty teńgeniń qubylmalyq táýekelderi saqtalady. Ulttyq bank teńgerimsizdiktiń jinalýyn boldyrmaityn jáne altyn-valiýta rezervteriniń saqtalýyn qamtamasyz etetin ikemdi aiyrbas baǵamy rejimin saqtaýdy jalǵastyrady", - dep qosty Pirmatov.
