Foto: Akorda.kz
Ulttyq bank tóraǵasy Ǵalymjan Pirmatov Májilis sailaýynan keiin teńge quldyraidy degen qaýesetti joqqa shyǵardy, dep habarlaidy Sputnik Qazaqstan saity.
Senat kýlýarynda jýrnalister "sailaýdan keiin teńge devalvatsiiaǵa ushyraidy degen qaýeset qanshalyqty ras?" dep surady.
"Biz valiýta naryǵyndaǵy barlyq is-qimylymyzdy ashyq júrgizemiz. Tek altyn-valiýta rezervteriniń interventsiiasy ǵana emes, Ulttyq qordyń valiýtalaryn satý, biz basqaratyn basqa qorlardaǵy valiýta operatsiialary baqylanady. Aldaǵy ýaqytta bul jumysty jalǵastyramyz. Sondyqtan sailaý qarsańynda Ulttyq bank baǵamǵa yqpal etip jatyr degen qaýeset shyndyqqa janaspaidy", - dep jaýap berdi Pirmatov.
Sondai-aq ol sońǵy kezde dollar nege qymbattap bara jatqanyn túsindirdi.
"Ulttyq banktiń negizgi mindeti – elimizde baǵanyń turaqtylyǵyn qamtamasyz etý. Biz infliatsiialyq targetteý saiasatyn júrgizemiz. Teńgeniń dollarǵa shaqqandaǵy baǵamyn biz belgilemeimiz. Teńgeniń baǵamy naryqtaǵy suranys pen usynystyń arqasynda óz mánin tabady. Al usynys pen suranysqa ártúrli faktor áser etedi", - dep túsindirdi Ulttyq bank tóraǵasy.
Ol jyldyń basynda teńgeniń dollarǵa shaqqandaǵy baǵamy 462,66 teńge bolǵanyn atap ótti. Al keshe dollar baǵamy 463,30 teńgemen jabylǵan.
"Demek týra jyldyń basyndaǵy baǵam bolyp tur. Azdaǵan qubylmalylyq bolady", - dedi Pirmatov.
