Foto: Sputnik / Vladislav Vodnev
Ulttyq bank pen Úkimet kvazimemlekettik sektor sýbektilerin valiýtalyq túsimderiniń 50%-yn mindetti túrde satýǵa mindetteitin buiryq pen qaýly daiyndaýda. 2023 jyldyń tamyzyna deiin qoldanysta bolǵan bul talap makroekonomikalyq jaǵdaidyń ózgerýine bailanysty ýaqytsha toqtatylǵan edi, endi qaita iske qosylmaq. Bul týraly Ult.kz habarlaidy.
Ulttyq banktiń málimetinshe, teńgeniń álsireýine birneshe faktorlar áser etken:
- - Dollardyń jahandyq nyǵaiýy (qyrkúiek aiynyń sońynan beri indeks DXY boiynsha +5,5%),
- - Munai naryǵyndaǵy suranystyń tómendigi men OPEK+ jetkizilimderiniń ósý boljamdary,
- - Ishki naryqtaǵy shetel valiýtasyna suranystyń artýy,
- - Biýdjet pen kvazimemlekettik sektordyń investitsiialyq jobalarǵa jumsaityn shyǵyndarynyń kóbeiýi, bul importty ulǵaitty.
Osy jaǵdailardy retteý úshin Ulttyq bank kvazimemlekettik sektor kompaniialaryn valiýtalyq túsimderiniń jartysyn satýǵa qaitadan mindetteýge sheshim qabyldady.
"Valiýta naryǵyndaǵy teńgerimdilikti arttyrý maqsatynda kvazimemlekettik sektor sýbektileriniń valiýtalyq túsimderiniń 50%-yn mindetti túrde satý talaby qaita engiziledi. Qazaqstan Respýblikasy Úkimetiniń tiisti qaýlysy men Ulttyq Banktiń buiryǵy ázirlenip, jaqyn kúnderi qabyldanady. Buǵan deiin bul talap 2023 jyldyń tamyzyna deiin qoldanysta bolǵan, alaida makroekonomikalyq jaǵdaidyń ózgerýine bailanysty ýaqytsha toqtatylǵan edi. Sonymen birge, bul talap shoktardy báseńdetý úshin jedel qoldanýǵa bolatyn tiimdi qural bolyp tabylady", — dep málimdedi Ulttyq bank tóraǵasynyń orynbasary Áliia Moldabekova.
Bul shara teńgeniń qunyn turaqtandyrýǵa jáne ekonomikalyq shoktardy jeńildetýge baǵyttalǵan.
Aita keteiik, sońǵy kúnderi teńgeniń quny kúrt tómendep, keibir aiyrbastaý oryndarynda dollar baǵamy 500 teńgege jetti.
