Teńge depozitteriniń 10 paiyzdyq ótemaqysyna ótinim qabyldaý kelesi aptada aiaqtala ma? Ulttyq banktiń basqarma tóraǵasy Ǵalymjan Pirmatov osy maǵynada taraǵan aqparattarǵa túsinik berdi, dep habarlaidy QazAqparat.
«Qazir Ulttyq banktiń teńge depozitterine 10 paiyzdyq syiaqy tóleý bastamasy belsendi nasihattalyp jatyr. Osy ótemaqyǵa ótinish tirketý úshin 1 apta ǵana qalǵany týraly aqparat tarady? Qanshalyqty shyn», - dep surady BAQ ókili brifing barysynda.
Tóraǵanyń sózine qaraǵanda, resmi kózderden ondai málimet shyqpaǵan.
«Birinshiden, men barshańyzdy resmi kózderden taraǵan aqparatty ǵana negizge alýǵa shaqyramyn. Atalǵan ótemaqyny tóleýdiń erejesin Úkimet qaýlysy bekitken. Ol ereje boiynsha, ótinimder 2023 jyldyń 1 qańtaryna deiin berilýi kerek. Ondai ótinishtiń qajettigi osy ótemaqyny alǵysy kelgen ár azamat óz nietin bankke habarlaý kerektigimen jáne ózi týraly belgili bir derekterdi ashýǵa kelisim berýi qajettigimen bailanysty. Bankterdiń kóbi óz klienterine bul ótinishti onlain rejimde rásimdeýge múmkindik berip otyr», - dedi Ǵalymjan Pirmatov.
Onyń aitýynsha, ózge bankter de atalǵan ótinishti onlain qabyldaý jumystaryn júrgizýde.
«Taǵy da eske salamyn, bul ótemaqyny ulttyq valiýtamen depozit ustaityn, 2022 jyldyń 23 aqpanynda shottarynda aqsha bolǵan jáne ol aqsha 2023 jyldyń 23 aqpanyna deiin saqtalǵan azamattar alady», - dedi Ulttyq bank basshysy.
