Kásiporyndar arasynda Ulttyq bank júrgizgen saýalnama nátijesi boiynsha, 2021 jyldyń II toqsanynda taý-ken ónerkásibinen jáne kólik pen qoimada saqtaý salasynan bólek barlyq salada daiyn ónimge degen suranystyń birshama nasharlaǵanyn ańǵarýǵa bolady.
Bul týraly 2021 jyldyń II toqsanynda ekonomikanyń naqty sektoryndaǵy kásiporyndarda júrgizilgen saýalnama nátijesi týraly (salalyq koniýnktýralyq sholý) baiandaǵan QR Ulttyq bankiniń Aqsha-kredit saiasaty departamentiniń direktory Jandos Shaimardanovtyń túsindirmesine aitylǵan.
Suranystyń ósý qarqynynyń baiaýlaýy óńdeý ónerkásibinde, saýdada, qurylysta baiqaldy. Aýyl sharýashylyǵy boiynsha suranys kórsetkishi teris aimaqqa aýysty. 2021 jyldyń 3-toqsanynda suranys ósse, ol tek aýyl sharýashylyǵynda ósedi degen boljam bar, al basqa salalarda ósý baiaýlap, tipti tómendep ketýi de múmkin.
2021 jyldyń 2-toqsanynda shikizat, materialdar men daiyn ónim baǵasynyń ósý qarqyny jedeldei túskeni barlyq salada baiqaldy. 2021 jyldyń 3-toqsanynda baǵanyń ósý qarqyny baiaýlaidy dep kútilýde.
«Sóz bolyp otyrǵan salalarda óndiris kólemi ulǵaiyp, diffýziialyq indeks ósý salasyna ótti. Óńdeý ónerkásibinde eń joǵary ósim bar. 2021 jyldyń 3-toqsanynda bul salada da ósý qarqyny báseńdeidi dep kútilýde»,-deidi Ulttyq bank ókili.
Onyń derekterinshe, atalǵan salalarda básekelestiktiń mańyzdylyǵy joǵary deńgeide, iaǵni, burynǵysynsha saqtalyp otyr. Saýda kásiporyndary naryqtyq básekelestiktiń yqpalynan shyǵa alar emes, munda kásiporyndardyń 40,1%-y óz biznesine qatysty básekelestiktiń áserin sezdi. Óńdeý ónerkásibinde mundai kásiporyndardyń úlesi 31,6%-ǵa, kólik salasynda 25,6%-ǵa, qurylys salasynda 24,9%-ǵa jetedi. Aýyl sharýashylyǵy men taý-ken ónerkásibinde eń az úles (tiisinshe 18,2% jáne 16,1%) baiqaldy.
Kásiporyndardyń edáýir bóligi (34,1%) úshin olardyń iskerlik belsendiligin tejeitin basty kedergi Qazaqstan ekonomikasynyń jai-kúiine qanaǵattanbaý bolyp tabylady. Bul rette óńdeý ónerkásibi men saýda salasy ónimge degen suranysqa bailanysty eleýli problemalardy (tiisinshe 30,9% jáne 27,6%) bastan keship otyr, aýyl sharýashylyǵy men óńdeýshi kásiporyndar bilikti kadrlardyń tapshy ekenin (tiisinshe 26,8% jáne 25,2%) alǵa tartty.
Kelesi 12 aida barlyq sala boiynsha qarjylandyrý kólemi burynǵy qalpynda saqtalady. Bul rette óńdeý jáne taý-ken óndirý ónerkásibi barynsha molyraq qarjylandyrylyp, kerisinshe, qurylys pen saýdada az qarjy bólinedi degen jospar bar.
«Saýalnamaǵa barlyǵy 2,6 myńnan astam óndirýshi men óńdeýshi ónerkásip, qurylys, saýda, aýyl sharýashylyǵy, kólik jáne qoima ustaýshy kásiporyndar qatysty»,-delingen habarlamada.
