AQSh dollary baǵamynyń qarqyny Federaldy rezerv júiesiniń málimdemesine orai ózgeredi. Bul týraly Ulttyq bank tóraǵasynyń orynbasary Áliia Moldabekova aitty, dep habarlaidy QazAqparat.
«AQSh dollary men eýronyń baǵamyna birqatar faktor yqpal etetini túsinkti. Olardyń arasynda negizgisi Federaldy rezerv júiesiniń (FRJ) saiasatyna qatysty. Buǵan deiin birneshe ret AQSh-tyń Federaldy rezerv júiesi infliatsiiamen kúres aiasynda bazalyq mólsherlemeni ary qarai kóteretini jaiynda málimdegen edi. Bul óz kezeginde valiýta naryǵyndaǵy ahýalǵa aitarlyqtai áser etip otyr», - dedi Moldabekova elordada ótken baspasóz máslihatynda.
Onyń aitýynsha, FRJ mólsherlemesiniń artýy dollardyń nyǵaiýyna alyp keledi. Bul turǵyda damyǵan jáne damýshy elderdiń valiýtalary, sonyń arasynda eýro baǵamy qubylmaly bolady. Sonyń saldarynan bul valiýtalar dollarǵa qaraǵanda álsirep otyr.
«AQSh dollary, eýro jáne basqa da valiýtalar baǵamynyń aldaǵy qarqyny Federaldy rezerv júiesiniń málimdemesine, sondai-aq paiyz mólsherlemesin kóterý qarqynyna orai ózgeredi», - dedi UB basshysynyń orynbasary.
Federaldy rezerv júiesi qatań monetarly saiasatty ustanyp otyrǵanyna toqtalǵan ol: «Sondyqtan naryqqa qatysýshylardyń kóbisi AQSh dollary ary qarai nyǵaia túsedi degen boljam aityp otyr», - dedi.
