2019 jylǵy 1 qańtardaǵy jaǵdai boiynsha Qazaqstan Respýblikasynyń syrtqy boryshy 158,8 mlrd AQSh dollaryn qurady. Onyń ishki jalpy ónimge qatynasy 93,1% bolyp, jyl basynan 9,5%-ǵa jaqsardy. Bir jylda Qazaqstannyń syrtqy qaryzy 5,04% nemese 8 430,6 mln dollarǵa azaidy, dep habarlaidy "Ult aqparat" Ulttyq banktiń baspasóz qyzmetine silteme jasap.
«Syrtqy borysh qurylymynda 63,6%-yn burynǵysynsha firmaaralyq bereshek, 25,0% bailanysty emes kreditorlar aldyndaǵy «Basqa sektorlardyń» syrtqy boryshy, 7,8% memlekettik syrtqy borysh (Úkimet pen Ulttyq Bank), 3,6% - «Bankter» sektorynyń syrtqy mindettemeleri (EDB jáne «Qazaqstannyń Damý Banki» AQ) qurap otyr. 2018 jylǵy 4-toqsanda ekonomikanyń banktik emes sektory mindettemeleriniń azaiýy esebinen eldiń syrtqy boryshy 2,5 mlrd AQSh dollaryna qysqardy. Memlekettik syrtqy borysh jalpy somasy 1,05 mlrd eýrony quraityn 5 jáne 10-jyldyq táýelsiz eýroobligatsiialardyń eki transhyn shyǵarý esebinen 899,1 mln AQSh dollaryna ósti» delingen habarlamada.
«Bankterdiń» syrtqy mindettemeleri toqsan ishinde ózgermedi, sebebi beirezidentterdiń qolyndaǵy eýroobligatsiialar kóleminiń azaiýy olardyń qazaqstandyq bankterdegi depozitteriniń ósýimen óteldi.
«Basqa sektorlardyń» úlestes emes kreditorlar aldyndaǵy syrtqy boryshy 1,6 mlrd AQSh dollaryna azaidy, ol, negizinen, qaryzdardy óteý esebinen, onyń ishinde ERG toby kásiporyndarynyń mindettemelerin qaita qarjylandyrý (963 mln AQSh dollaryna azaiý), «QazMunaiGaz» UK» AQ-tyń «Sberbank Rossii» PAO aldyndaǵy (371 mln AQSh dollary) jáne «Qaztemirtrans» AQ-tyń EQDB aldyndaǵy qaryzdaryn óteý esebinen oryn aldy.
Aita keteiik, Qazaqstannyń taza syrtqy boryshy 2018 jylǵy 4-toqsanda 560,5 mln AQSh dollaryna azaiyp, 47,2 mlrd AQSh dollaryn qurady. Bul rette memlekettik sektor jáne «Bankter» qalǵan álemge qatysty taza kreditorlar bolyp, al «Basqa sektorlar» taza qaryz alýshylar bolyp tabylady.
