QR Ulttyq banktiń ókili 2020 jyldyń 1 qańtarynan kúshine enetin ipotekalyq turǵyn úi zaemdaryn qaita qarjylandyrý baǵdarlamasynyń ózgeristeri týraly aitty, dep habarlaidy "Ult aqparat".
QR UB Qarjy qyzmetteri tutynýshylarynyń quqyqtaryn qorǵaý departamentiniń direktory Aleksandr Terentevtiń sózine qaraǵanda, memleket qosymsha qarjy bólmeidi. Bosańsytý sharalaryn usyný týraly sheshimdi jan-jaqty taldaýdan keiin kreditor-bank qabyldaidy.
«Birinshi kezekte bul túzetýler halyqtyń áleýmettik turǵyda osal toptary ókilderin qoldaýǵa baǵyttalǵan. Olarǵa múgedek balany tárbilep otyrǵan otbasylar, múmkindigi shekteýli jandar, tolyq emes otbasylar kiredi. Sonymen qatar, asyraýshysynan aiyrylý nemese múgedektikke shaldyǵý sekildi ómirlik qiyn jaǵdailar bolyp jatady», - dedi A.Terentev.
Munymen qosa, zaemdar boiynsha mindettemeni oryndaý esebinen jalǵyz múlki bank balansyna ótip ketken azamattardy qoldaý sharalary eskerilgen.
«Qarjylandyrýǵa toqtalsaq, qosymsha qarjy bólý qarastyrylmaǵan. Ipotekalyq qaryz alýshylardy qoldaýdyń bul sharalary buǵan deiin ipotekalyq zaemdardy qaita qarjylandyrýǵa bólingen qarajat aiasynda iske asyrylady. Qarajat bankterde salymdarda ornalastyrylady. Bul qarajat shartpen belgilengen merzim ótkennen keiin Ulttyq bankke qaitarylady», - dedi UB ókili.
Aita keteiik, valiýtalyq ipotekalyq qaryzdardy qaita qarjylandyrý merzimi 2020 jylǵy 31 jeltoqsanǵa deiin uzartyldy. Qaryz alýshylar valiýtalyq ipotekalyq qaryzdardy qaita qarjylandyrý úshin 2020 jylǵy 15 jeltoqsannan keshiktirmei kreditor bankke ótinish berýi qajet.
