Ulttyq bank ikemdi baǵam belgileý saiasatyn ustanýdy jalǵastyrady. Bul týraly búgin Úkimet otyrysynda QR Ulttyq bank tóraǵasy Ǵalymjan Pirmatov aitty, dep habarlaidy QazAqparat.
«Qolma-qol shetel valiýtalary naryǵynda barynsha naryqtyq baǵam belgileýdi qamtamasyz etý maqsatynda Ulttyq bank aiyrbastaý pýnktteri arqyly teńgege shetel valiýtasyn satyp alý baǵamynyń satý baǵamynan aýytqý shekterin keńeitý boiynsha túzetýler ázirledi. Qarjylyq turaqtylyq táýekelderiniń aldyn alý jáne alypsatarlyq suranystyń qysymyn tómendetý maqsatynda QR Prezidentiniń Jarlyǵymen elden 10 000 AQSh dollarynan joǵary qolma-qol shetel valiýtasyn jáne shetel valiýtasyndaǵy aqsha quraldaryn, salmaǵy 100 gramnan asatyn tazartylǵan altyndy, altyn quimalardy áketýge shekteý engizildi. Bul qolma-qol shetel valiýtasynyń shamadan tys áketilýin baqylaýdy jáne Ulttyq bank rezervteriniń saqtalýyn qamtamasyz etedi», - dedi Ǵalymjan Pirmatov.
Onyń aitýynsha, ekinshi deńgeidegi bankter men Ulttyq bank Qazaqstanǵa qolma-qol shetel valiýtasyn jetkizý jónindegi is-sharalardyń búkil tizbesin qabyldaýda. Bul rette ekinshi deńgeidegi bankter shottardaǵy, depozitterdegi jáne baǵaly qaǵazdardaǵy qaldyqtar túrindegi ótimdi valiýtalyq aktivterdiń jetkilikti kólemine ie.
«Ulttyq bank shoktardy retke keltirip, disbalanstardyń jinaqtalýyn boldyrmaityn jáne rezervterdi oryndy paidalanýǵa múmkindik beretin ikemdi baǵam belgileý saiasatyn ustanýdy jalǵastyrady», - dedi ol.
