Ulttyq bank ózgermeli baǵam kezinde erkin infliatsiiany targetteý rejimin ustana beredi. Bul týraly Úkimet otyrysynda atalǵan qardy uiymynyń tóraǵasy Ǵalymjan Pirmatov málim etti, dep habarlaidy QazAqparat.
«Saýda-sattyq qorytyndysy boiynsha teńge baǵamy bir dollar úshin 495 teńge 00 tiyn deńgeiinde qalyptasty. Saýda-sattyq kólemi 159,5 mln dollardy qurady. Qubylmalylyqtyń joǵarylaýyn eskere eskersek, QR Ulttyq bankiniń valiýta interventsiialary 98,1 mln dollar bolyp, saýda-sattyq kóleminiń 61,5%-yn qurady», - dedi Ulttyq bank basshysy.
Sondai-aq ol Ulttyq bank naryqtardy qadaǵalap, jaǵdai budan ári nasharlaǵan kezde qarjylyq jáne makroekonomikalyq turaqtylyqty qamtamasyz etý úshin pármendi sharalar qabyldaýyn jalǵastyratynyn atady.
«Ulttyq bank naryqtyq baǵam belgileýge kedergi keltirmei jáne belgili bir baǵam deńgeiiniń targettelýin boldyrmastan, erkin ózgermeli baǵam kezinde infliatsiialyq targetteý rejimin ustanýdy jalǵastyrady.
Bul rette, biz qarjylyq turaqtylyq úshin táýekelder kúsheigen jaǵdaida valiýtalyq interventsiialardy júrgizýdi jalǵastyramyz», -dedi Ǵalymjan Pirmatov.
Aitýynsha, bank tarapynan qabyldanatyn sharalar kesheni teńgedegi aktivterdiń tartymdylyǵyn saqtaýǵa, dollarlaný táýekelderin jáne aiyrbastaý baǵamyna qysymdy tómendetýge, sondai-aq infliatsiianyń eleýli túrde ósý táýekelderin jeńildetýge baǵyttalǵan.
