Premer-Ministr Asqar Maminniń tóraǵalyǵymen ótken Úkimet otyrysynda Ulttyq bank tóraǵasy Erbolat Dosaev biyl 10 shildede Úkimettiń keńeitilgen otyrysynda Memleket basshysynyń bergen tapsyrmalaryn iske asyrý sharalary týraly baiandady, dep habarlaidy "Ult aqparat" primeminister.kz saityna silteme jasap.
Birinshi – 2020 jyly infliatsiiany 8-8,5% dáliz sheginde ustap turýǵa baǵyttalǵan aqsha-kredit saiasatyn júrgizý.
«Ol úshin Ulttyq Bank qolda bar quraldardy paidalanatyn bolady. Sonymen qatar, Memleket basshysynyń monetarlyq emes infliatsiiany tómendetý tapsyrmasyn oryndaý maqsatynda naryqtardy taýarlarmen toltyrý, jetkizý tizbegin ońtailandyrý jáne alypsatarlyqqa jol bermeý jolymen Úkimet pen jergilikti atqarýshy organdar tarapynan importqa táýeldilikti azaitý boiynsha sharalar qabyldaý qajet. Bul aqsha-kredit saiasatyn iske asyrýdyń tiimdiligin arttyrýǵa múmkindik beredi», — dedi E. Dosaev.
Ekinshi – budan buryn qabyldanǵan daǵdarysqa qarsy sharalar men jańa bastamalardyń negizinde ekonomikany qalpyna keltirýge qatysý. Ulttyq Bank pen Qarjy naryǵyn retteý jáne damytý agenttigi Úkimetpen birlesip aǵymdaǵy jylǵy shildeniń sońyna deiin áleýmettik-ekonomikalyq ahýal nasharlaǵan jaǵdaiǵa salalardy qoldaýdyń qosymsha sharalar toptamasyn daiyndaidy. Memleket basshysynyń daǵdarysqa qarsy bastamalarynyń sheńberinde Agenttik pen Ulttyq Bank prýdentsiialyq retteý sharalary men memlekettik baǵdarlamalardy qarjylandyrý arqyly ekonomikany kreditteýdi yntalandyrýdy jalǵastyrady.
Úshinshi – ekonomikalyq belsendilikti qoldaý úshin qarjy naryǵyn damytý.
«Investorlardy tartý úshin kiristilik qisyǵyn qurý boiynsha jumys jalǵasady. Ol úshin Qarjy ministrligimen birlesip 2020 jyly 1 jyldan 3 jylǵa deiingi sektorda jáne 2021-2022 jyldary 1 jyldan 5 jylǵa deiingi sektorda memlekettik baǵaly qaǵazdardy shyǵarý qamtamasyz etiletin bolady», — dedi E. Dosaev.
2020 jyldyń sońyna deiin turaqty negizde 1 trln teńgege deiingi kólemde qysqa merzimdi qaǵazdardy shyǵarýmen MBQ-ny shyǵarý kestesine tiisti ózgerister engizildi. Bul Qazaqstannyń memlekettik baǵaly qaǵazdaryn obligatsiialardyń halyqaralyq indeksterine engizý jumysyn jalǵastyrýǵa múmkindik beredi.
«Qor naryǵyn ekonomikaǵa investitsiialar tartýdyń mańyzdy kózi retinde odan ári damytý úshin Agenttik Ulttyq Bankpen jáne Úkimetpen birlesip, onyń artta qalý problemalary men sebepterine taldaý júrgizedi, sonyń negizinde qor naryǵyn odan ári damytý, onyń ishinde ony AHQO áleýeti men infraqurylymyn paidalana otyryp, halyqaralyq kapital naryqtarymen yqpaldastyrý jóninde keshendi usynystar daiyndaidy», — dedi Ulttyq Bank tóraǵasy.
Tórtinshi – júielik táýekelderdiń jinalýyn boldyrmaý úshin qarjylyq turaqtylyqty qamtamasyz etý. Ekonomikalyq ainalymǵa jumys istemeitin aktivterdi tartý úshin Problemalyq kreditter qorynyń múlkin satý boiynsha jumys júrgiziledi, bul jumys istemeitin aktivterdiń tiimdi naryǵyn qurýǵa múmkindik beredi. Júielik táýekelderdi azaitý maqsatynda Agenttik Ulttyq Bankpen birlesip bank júiesi aktivteriniń sapasyn (AQR) udaiy negizde baǵalaý úshin usynystar daiyndaidy.
