Qazaqstan Respýblikasy Ulttyq bankiniń aqsha-kredittik saiasat jónindegi komiteti bazalyq mólsherlemeni jyldyq 14,75%-ǵa deiin tómendetý týraly sheshim qabyldady, dep habarlaidy "Ult aqparat".
Ulttyq bank málimetinshe, qańtarda jyldyq infliatsiianyń tómendeý úrdisi jalǵasyn tapty. Infliatsiialyq boljamdar úsh ai qatarynan baiaýlap keledi. Al ailyq infliatsiia ortasha jyldyq mánderden joǵary qalyptasýda. Syrtqy infliatsiialyq jaǵdai beitarap kúide qalyptasyp otyr. Birqatar saýda-seriktes elderde infliatsiia birshama qarqyn alyp, syrtqy infliatsiialyq qysym sál kúsheidi.
Álemdik azyq-túlik baǵasynda tómendeý úrdisi jalǵasyp, syrtqy infliatsiialyq jaǵdaiǵa oń áserin tigizip otyr. Ishki ekonomikada ornyqty ishki suranysqa jáne turaqtana qoimaǵan infliatsiialyq kútýlerge bailanysty infliatsiialyq qysym saqtalyp otyr.
Búgingi jaǵdaida aqsha-kredit saiasatyn jumsartýǵa múmkindik edáýir shekteýli. Infliatsiialyq faktorlarda qalyptasqan balans, onyń qazirgi (ailyq) qarqynynyń dinamikasy jáne fiskaldyq saiasat parametrlerindegi belgisizdik aldaǵy ýaqytta sheshim qabyldaý kezinde bazalyq mólsherlemeniń búgin qalyptasqan deńgeiinde saqtalý yqtimaldyǵyn arttyryp otyr.
Bul rette derekterdi jinaý, sondai-aq ekonomikalyq jáne fiskaldyq reformalardyń iske asyrylýyn monitoringteý qajet.
Jyldyq infliatsiia 2024 jylǵy qańtarda 9,5%-ǵa deiin baiaýlady. Bul Ulttyq Banktiń boljamyna sáikes keledi.
Aita keteiik, bazalyq mólsherleme – eldegi ortalyq banktiń aqsha qunyn basqarý tetigi. Ulttyq bank bazalyq stavkany ekinshi deńgeili bankterge kredit bererde jáne olardyń aqshasyn depozitke qabyldarda qoldanady. Iaǵni Ulttyq bank kommertsiialyq bankterge nesieni dál osy bazalyq stavkamen beredi, depozitke de osy mólsherlememen qabyldaidy.
