Qazaqstan Respýblikasy Ulttyq Bankiniń Aqsha-kredit saiasaty jónindegi komiteti bazalyq mólsherlemeni +/– 1,00p.t. paiyzdyq dálizimen jyldyq 13,50% deńgeiinde belgileý týraly sheshim qabyldady. Tiisinshe, ótimdilikti usyný jónindegi turaqty qoljetimdi operatsiialar boiynsha mólsherleme – 14,50%, al ótimdilikti alý jónindegi turaqty qoljetimdi operatsiialar boiynsha mólsherleme 12,50% bolady, dep habarlaidy Ulttyq banktyń baspasóz qyzmeti.
Mólsherlemeni ózgerissiz qaldyrý týraly sheshim onyń aǵymdaǵy deńgeii Ulttyq Banktiń geosaiasi táýekelderdi jáne infliatsiialyq protsesterdiń jedeldeý táýekelin arttyrýǵa yqpal etetinine orai negizdeldi. Bul rette syrtqy jáne ishki makroekonomikalyq ahýal budan bylai da nasharlaǵan jaǵdaida monetarlyq talaptardy odan ári kúsheitý úshin keńistik qalady. Ulttyq Bank makroekonomikalyq jaǵdaidyń jáne Qazaqstan qarjy naryǵynyń turaqtylyǵyn qamtamasyz etý sharalaryn qabyldaýdy jalǵastyrady.
"Infliatsiianyń barlyq quramdas bólikteri boiynsha baǵalardyń ósýi aiasynda 2022 jylǵy aqpanda jyldyq infliatsiia 8,7%-ǵa deiin (2022 jylǵy qańtarda – 8,5%) kóterildi.
Azyq-túlik taýarlarynyń baǵasy nan-toqash ónimderi men jarma, kókónisterdiń qymbattaýyna bailanysty 10%-ǵa (osy jylǵy qańtardaǵy 9,9%-dan) kóterildi. Azyq-túlikke jatpaityn infliatsiia 8,6%-ǵa deiin (8,5%) ulǵaidy. Turmystyq tehnika, jihaz ben turmysta qoldanylatyn taýarlar baǵasynyń joǵary ósimi saqtalyp otyr. Benzin men dizel otyny baǵalaryn ýaqytsha retteý jaǵdaiynda janar-jaǵarmai (JJM) naryǵynda dezinfliatsiia baiqalady. Alaida JJM baǵasynyń ósýi jyldyq kórsetýde áli de bolsa joǵary mánderde (22,1%) saqtalyp qaldy.
Aqyly qyzmet kórsetý 2021 jylǵy aqpanmen salystyrǵanda biylǵy aqpanda 7,1%-ǵa (6,8%) qymbattady, ol jekelegen naryqtyq qyzmetke baǵanyń ósýine bailanysty boldy. Turǵyn úidi jaldaý qunynyń jyldyq ósimi 20,7% boldy. Sonymen qatar baǵa ósýine jariialanǵan moratorii aiasynda gazdyń baǵasy 5,4%-ǵa deiin (2021 jylǵy jeltoqsanda – 12,9%) baiaýlaǵany baiqalady" - delingen habarlamada.
Syrtqy sektor belgisizdiktiń óte joǵary deńgeiimen sipattalady. Jahandyq ekonomika geosaiasi táýekelderdiń qysymyna ushyrap otyr. Osyǵan bailanysty biyl jáne kelesi jyly álemdik ekonomika buryn boljanǵannan barynsha tómen qarqynmen ósedi dep kútiledi.
Syrtqy naryqtardaǵy jaǵdai baǵa ósýimen sipattalady. Energiia tasymalynyń, metall men aýylsharýashylyq ónimderiniń baǵasy kúrt ósýine bailanysty jahandyq infliatsiianyń buryn boljanǵannan joǵary mánderde uzaq ýaqytqa qalý yqtimaldylyǵy joǵary.
"2014 jyldan bastap Brent surypty munai baǵasy alǵash ret barreline 100 AQSh dollarynan asty. Geosaiasi shielenistiń kúsheiýine bailanysty Reseiden munai jetkizýdegi irkilis táýekelinen joǵary baǵa qoldaý taýyp otyr. Sonymen birge, joǵary suranys pen 2022 jylǵy qańtardaǵy naqty óndiris ruqsat etilgen kvotalardan tómen bolǵan OPEK+ elderiniń munaidy barynsha az óndirýi aiasynda álemdik munai qorlarynyń tómendeýi baiqalady. Álemdegi búgingidei joǵary belgisizdikke qaramastan, jalpy alǵanda, álemdik munai naryǵynyń budan bylaiǵy damý perspektivasy pozitivti bolyp qalyp otyr.
Biylǵy aqpanda FAO azyq-túlik baǵasynyń indeksi ósimdik maiy, sút ónimderi, astyq jáne et baǵalarynyń aitarlyqtai ósýi aiasynda tarihi rekordtyq deńgeige jetti. Resei-Ýkraina qaqtyǵysy álemdik naryqta bidaidyń tapshylyǵyna ákelip soǵady degen qaýip-qaterge bailanysty bidai quny 14 jyldyq eń joǵary kórsetkishti jańartty.
Saýda áriptes elderindegi kúrt ózgerip jatqan geosaiasi jáne syrtqy ekonomikalyq jaǵdai men buryn-sońdy bolmaǵan belgisizdik deńgeii boljamdardy tolyqqandy daiyndaý múmkindikterin edáýir qiyndatyp otyr. Osyǵan bailanysty Ulttyq Banktiń boljamdary saraptamalyq baǵalaýmen tolyqtyryldy jáne negizgi makroekonomikalyq kórsetkishterdiń yqtimal baǵytyn sapaly baǵalaý úshin qalyptastyryldy.
Ulttyq Banktiń baǵalaýy boiynsha, infliatsiia aldyńǵy boljamdardan joǵary bolyp qalyptasatyn bolady. Infliatsiianyń barynsha joǵary serpininiń negizgi sebebi azyq-túlikke jatpaityn taýarlardy tutynýdaǵy importtyń joǵary úlesine bailanysty teńgeniń aiyrbastaý baǵamynyń álsireýin ishki baǵalarǵa aýystyrý bolyp tabylady. Sondai-aq azyq-túlik pen energiia resýrstary baǵasynyń ósýine bailanysty, birinshi kezekte, Reseidegi infliatsiianyń kútiletin jedeldeýi jáne álemdegi infliatsiialyq qysymnyń joǵarylaýy aiasynda syrtqy infliatsiia aiasy kúsheiedi degen boljam bar. Osylaisha, 2022 jyldyń qorytyndysy boiynsha nysanaly baǵdardan asyp ketý táýekeli aitarlyqtai ósti" - delingen resmi habarlamada.
Geosaiasi daǵdarysqa bailanysty Qazaqstan ekonomikasy ósýiniń buryn boljanǵannan da tómen baǵyty kútilýde. Ekonomikanyń ósý qarqynyna shikizat taýarlaryna joǵary baǵalar, biýdjet shyǵystarynyń áleýetti ósýi, sondai-aq epidemiologiialyq jaǵdaidyń jaqsarýy yqpal etedi.
Bazalyq mólsherleme boiynsha budan bylaiǵy sheshimder infliatsiia serpinine jáne infliatsiialyq kútýlerge, geosaiasi jaǵdaidyń damýyna jáne oǵan qarjy naryqtarynyń yqpal etýine bailanysty bolady. Ulttyq Bank infliatsiiany nysanaly mánderge qaitarý úshin barlyq qajetti sharalardy qabyldaýdy jalǵastyrady.
Qazaqstan Respýblikasy Ulttyq Bankiniń Aqsha-kredit saiasaty jónindegi komitetiniń bazalyq mólsherleme boiynsha kezekti josparly sheshimi 2022 jyly 25 sáýirde Nur-Sultan ýaqyty boiynsha saǵat 15:00-de jariialanady.
