Foto: Ulttyq banktiń baspasóz qyzmeti
QR Ulttyq Bankiniń Aqsha-kredit saiasaty komiteti bazalyq mólsherlemeni +/– 1 p.t. dálizimen jyldyq 16,75% deńgeiinde saqtaý týraly sheshim qabyldady, dep habarlaidy "Ult aqparat" UB baspasóz qyzmetine silteme jasap.
"Jahandyq infliatsiialyq qysym báseńdep keledi, biraq birqatar elde infliatsiia áli de ornyqty kúiinde qalyp otyr. Osyǵan bailanysty damyǵan elderdiń ortalyq bankteri monetarlyq saiasatty qatańdatyp jatyr. Qazaqstanda infliatsiianyń jyldyq jáne ailyq mánderi de baiaýlap keledi.
Táýekelderdiń jiyntyq balansy, negizinen, syrtqy sektor jaǵynan qysymnyń álsireýinen dezinfliatsiialyq faktorlarǵa qarai azdap yǵysqan kúide saqtalyp otyr. Alaida bazalyq infliatsiianyń álsiz baiaýlaýy jáne infliatsiialyq kútýlerdiń ósýi baiypty monetarlyq saiasatty iske asyrýdy talap etedi. Ulttyq Banktiń aldyńǵy kommýnikatsiialaryna sáikes, infliatsiianyń baiaýlaýy bolashaqta bazalyq mólsherlemeni birtindep tómendetýge jaǵdai jasai bastady. Osyǵan bailanysty boljamdy raýnd nátijeleri boiynsha qabyldanatyn kelesi sheshim aiasynda Ulttyq Bank bazalyq mólsherlemeni baiyppen tómendetýdiń oryndylyǵyn baǵalaidy.
Jyldyq infliatsiia boljamdy diapazon sheginde qalyptasýda jáne 2023 jylǵy maýsymda 14,6%-dy qurady. Ailyq infliatsiia mamyrda tómendeý úrdisin qaita jalǵastyryp, maýsymda 0,5%-ǵa deiin baiaýlady. Janar-jaǵarmai baǵasy kóterilýiniń janama áseri áli baiqalmaidy. Alaida bazalyq infliatsiia kórsetkishteriniń álsiz baiaýlaýy ekonomikada ornyqty suranystyń saqtalǵanyn kórsetedi" - delingen habarlamada.
Infliatsiianyń baiaýlaýyna qaramastan, infliatsiialyq kútýler jedeldep jatyr. Bir jyldan keiin kútiletin infliatsiia maýsymda 17,2% (mamyrda – 17%) boldy. Seziletin infliatsiia maýsymda 18,8%-dy qurap, burynǵydai joǵary kúiinde qalyp otyr. Baiqalyp otyrǵan infliatsiialyq kútýlerdiń ósýi janar-jaǵarmai men turǵyn-úi kommýnaldyq qyzmet baǵalarynyń kóterilýine boljanǵan reaktsiia bolyp tabylady.
"Syrtqy infliatsiia baiaýlaýyn jalǵastyrǵanmen, áli de ornyqty qalpynda. Bul azyq-túlik pen qýat kózine degen álemdik baǵalardyń tómendeýi aiasynda oryn alyp otyr. Alaida infliatsiianyń ornyqtylyǵyna jáne onyń nysanaly baǵdarlardan uzaq ýaqyt boiy joǵary bolyp qalýyn kútýge bailanysty keibir ortalyq bankter aqsha-kredit sharttaryn qatańdatýdy jalǵastyryp keledi. AQSh FRJ men EOB ritorikasy qatańdap, negizgi mólsherlemelerdiń odan ári kóteriletinin bildirdi. Ortalyq bankterdiń saiasaty Qytai ekonomikasynyń baiaý qalpyna kelýi aiasynda álemdik retsessiiaǵa alańdaýshylyqty kúsheitip, munai baǵasyna qysym jasap otyr. Munai naryǵynda qubylmalylyq bar. Osynyń saldarynan qazirgi ýaqytta munai baǵasy bazalyq stsenariidegi 2023 jylǵy ortasha eseppen 1 barrel úshin 82 AQSh dollary deńgeiinen tómen qalyptasyp otyr.
Ekonomikanyń ósý traektoriiasy Ulttyq Banktiń boljamyna sáikes keledi. 2023 jylǵy qańtar-mamyrda Qazaqstannyń ekonomikasy 4,5%-ǵa ósti. Infraqurylymdyq ǵimarattardy qosa alǵandaǵy qurylys kóleminiń artýy, saýdanyń ósýi, sondai-aq aqparat pen bailanys JIÓ-niń ósýine negizgi úles qosty. Ishki tutynýshylyq suranys joǵary infliatsiialyq kútýler men tutynýshylyq kreditterdiń turaqty ósýi aiasynda ornyqty qalpynda qaldy. Buǵan bólshek saýda taýar ainalymynyń dinamikasy men tutyný taýarlary importynyń aitarlyqtai ósýi dálel" - delingen habarlamada.
Ulttyq bank málimetinshe, proinfliatsiialyq táýekelder negizinen ishki faktorlar jaǵynan saqtalyp otyr. Infliatsiialyq kútýler joǵary jáne qubylmaly qalpynda. Bul eldegi joǵary proinfliatsiialyq jaǵdaidy kórsetedi. Fiskaldyq yntalandyrýdyń kúsheiýi jaǵynan eldegi baǵalarǵa qysym saqtalady. Syrtqy ortanyń táýekelderi álemdegi infliatsiianyń meilinshe aqyryn baiaýlaýyna jáne belgisizdiktiń ósýine bailanysty. Bul aqsha-kredit saiasatyn júrgizýde baiypty tásildi qajet etedi.
"Bazalyq mólsherlemeniń qazirgi deńgeii infliatsiialyq protsesterdiń baiaýlaýyn qoldaýǵa, memlekettik shyǵystardyń ósýin ishinara teńestirýge jáne infliatsiialyq kútýlerdiń joǵary deńgeide turaqtalýyn aldyn alýǵa múmkindik beredi. Degenmen Ulttyq Banktiń aldyńǵy sheshim boiynsha kommýnikatsiialarynda aitylǵandai, infliatsiianyń baiqalyp otyrǵan baiaýlaý úrdisi bazalyq mólsherlemeni birtindep tómendetýge jaǵdai jasai bastady. Osyǵan bailanysty boljamdy raýnd nátijeleri boiynsha kelesi sheshim aiasynda Ulttyq Bank bazalyq mólsherlemeni baiyppen tómendetýdiń oryndylyǵyn baǵalaidy. Ulttyq Banktiń sheshimderi bazalyq mólsherlemeni ortamerzimdi bolashaqta infliatsiia boiynsha 5% maqsatyna birtindep jetýge múmkindik beretin deńgeide ustap turýǵa baǵyttalady" - delingen UB usynǵan aqparatta.
Qazaqstan Respýblikasy Ulttyq Bankiniń Aqsha-kredit saiasaty komitetiniń bazalyq mólsherleme boiynsha kezekti josparly sheshimi 2023 jylǵy 25 tamyzda Astana qalasynyń ýaqytymen saǵat 12:00-de jariialanady.
