Ulttyq bank tóraǵasy Ǵalymjan Pirmatov teńge baǵamyna qatysty jaǵdaiǵa pikir bildirdi, - dep habarlaidy Tengrinews.kz tilshisi.
Premer-ministr Álihan Smaiylov Úkimet otyrysyn Ýkrainadaǵy oqiǵalardyń ekonomikalyq jaǵdaiǵa áseri týraly suraqtan bastaýdy usyndy.
"Geosaiasi jaǵdaidyń shielenisýi jáne Reseige qarsy sanktsiialar salynýy bizdiń ekonomikamyzǵa da áser etip jatyr. Resei rýbliniń aitarlyqtai álsireýi nátijesinde Qazaqstannyń qarjy naryǵyna qysym kúsheiip otyr.
Syrtqy kúizelistiń jaǵymsyz saldaryn barynsha azaitý maqsatynda Ulttyq bank infliatsiianyń aitarlyqtai ósý táýekelderin azaitýǵa, teńge jinaqtaryn qorǵaýǵa jáne eldiń altyn-valiýta rezervterin utymdy paidalanýǵa baǵyttalǵan keshendi sharalardy júrgizip jatyr", - dedi Ǵalymjan Pirmatov.
Ulttyq bank basshysy teńgege qatysty jaǵdaiǵa den qoiý týraly aitty.
"24 aqpanda Ulttyq bank bazalyq mólsherlemeni 13,5 paiyzǵa deiin kóterý týraly kezekten tys sheshim qabyldady. Bul sheshim ulttyq valiýtaǵa qysym men infliatsiiany tómendetýge, sondai-aq teńge aktivteriniń saqtalýyna baǵyttalǵan", - dedi Pirmatov.
Úkimetpen birlesip is-sharalar josparyn júzege asyrý bastalǵany aityldy. Jeke tulǵalardyń teńgedegi depozitteri boiynsha biýdjet qarajaty esebinen ótemaqy (syilyqaqy) esepteýdi kózdeitin teńgelik depozitterdi qorǵaý baǵdarlamasy jariialanǵan.
Sondai-aq, bazalyq mólsherleme óskennen keiin Qazaqstandyq depozitterge kepildik berý qory turǵyndardyń teńgedegi depozitteri boiynsha shekti mólsherlemeni kóterdi.
"Qarjylyq turaqtylyq táýekelderin eskere otyryp, Ulttyq bank ótken aptada 176 million dollarǵa valiýtalyq interventsiia júrgizdi. Biz interventsiialarymyz týraly aqparatty jedel jariia etemiz", - dep qosty Pirmatov.
Pirmatov Ulttyq bank oqiǵalardy baqylap, Reseige qarsy jańa sanktsiialardyń Qazaqstannyń qarjy júiesine áser etý dárejesin baǵalaitynyn aitty.
"26 jáne 27 aqpanda AQSh pen Eýropa elderi reseilik jekelegen bankterdi SWIFT júiesinen ajyratý jáne Resei Ortalyq bankiniń aktivterin buǵattaý arqyly reseilik qarjy sektoryna qarsy buryn-sońdy bolmaǵan shekteý sharalarynyń jańa paketin jariialady. Shekteý áserin barynsha azaitý úshin Qazaqstan daǵdarysqa qarsy sharalardyń kelesi kezeńin júzege asyrýǵa kiristi", - dedi Pirmatov.
