Ulttyq bank infliatsiiany maqsatty dálizge qalai jáne eń bastysy qashan qaitarady? Elimizde aqsha-kredit saiasaty kúsheitile me? Bul suraqqa QR Ulttyq banki tóraǵasynyń orynbasary Aqyljan Baimaǵambetov QazAqparat tilshisine bergen ekskliýzivti suhbatynda jaýap qatty.
«Infliatsiiany maqsatty dálizge qaitarý úshin bizge bir mezgilde eki baǵyt boiynsha áreket etý qajet. Birinshiden, bul – Ulttyq banktiń orta merzimdi keleshekte infliatsiia boiynsha maqsatty kórsetkishterge qol jetkizýge barynsha kúsh salýy. Infliatsiiany josparly túrde tómendetý úshin Ulttyq bank paiyzdyq saiasatqa basa nazar aýdara otyryp aqsha-kredit saiasatyn jalǵastyrady. Ulttyq banktiń paiyzdyq saiasaty naryqtyq mólsherlemelerdi bazalyq mólsherlemeniń paiyzdyq dálizi sheginde ustap turýǵa baǵyttalady»,- dedi A. Baimaǵambetov suhbat bere otyryp.
Sondai-aq, tóraǵa orynbasary Ulttyq bankte aqsha naryǵyndaǵy paiyzdyq mólsherlemelerdi retteýge arnalǵan aqsha-kredit saiasaty quraldarynyń tutas jiyntyǵy baryn aitty.
«Onyń ishinde bazalyq mólsherleme negizgisi bolyp otyr. Qazirgi ýaqytta paiyzdyq arnanyń infliatsiialyq protsesterge áseri áli de shekteýli ekenin moiyndaý kerek jáne biz onyń tiimdiligin arttyrýǵa umtylamyz. Aqsha-kredit saiasatynyń 2030 jylǵa deiingi strategiiasynda biz monetarlyq negizderdi kúsheitýge, qarjy naryǵyn damytýǵa baǵyttalǵan birqatar bastamalardy jáne makroekonomikalyq saiasattyń tiimdiligin arttyrý úshin qurylymdyq reformalardy kózdedik. Ekinshi baǵyt - buǵan deiin aitqanymyzdai, negizinen aqsha-kredit saiasatynyń yqpalynan tys jatqan usynys jaǵynan kóptegen faktorlar bar», - deidi ol.
Onyń sózinshe, infliatsiianyń nysanaly kórsetkishine qol jetkizý úshin Úkimet tarapynan júieli sharalardy qabyldaý talap etiledi.
Odan bólek, A. Baimaǵambetov ekonomikany ártaraptandyrý, tutyný naryǵyn otandyq taýarlarmen toltyrý, shikizatqa jatpaityn eksportty keńeitý, sondai-aq fiskaldyq tártipti arttyrý mindet ekenin basa aitty.
Jáne Ulttyq bank ókili infliatsiiaǵa qarsy áreket etý sharalary keshenin qabyldaý jumysy Memleket basshysynyń biylǵy 10 shildede Úkimettiń keńeitilgen otyrysynda bergen tapsyrmasyna sáikes júrgizilip jatqanyn alǵa tartty.
«Úkimet pen Ulttyq banktiń tiisti sharalardy birlesip iske asyrýy – baǵa ósimin baqylaýdy kúsheitýge jáne 2022 jyly infliatsiiany maqsatty dáliz deńgeiine deiin tómendetýge múmkindik beredi. Bul rette Memleket basshysy tapsyrǵan bizdiń orta merzimdi mindetimiz – 2025 jyly 3-4% infliatsiiaǵa qol jetkizý», - deidi Ulttyq bank basshysynyń orynbasary.
