Búgin Ortalyq kommýnikatsiialar qyzmetinde elimizdiń tanymal dástúrli ánshileri, jyrshy-termeshileri men kúishilerin toǵystyratyn «Uly dala sazy» atty jańa jobanyń tanystyrylymy ótti.
Baspasóz májilisine «Qazaqstan» teleradiokorporatsiiasynyń Basqarma tóraǵasy Erlan Qarin, QR Eńbek sińirgen qairatkeri, termeshi, ánshi Aigúl Elshibaeva, QR Eńbek sińirgen qairatkeri, ánshi Erlan Rysqali, QR Eńbek sińirgen qairatkeri, kúishi Janǵali Júzbai qatysty.
Mýzykalyq jobanyń maqsaty - Atadan-balaǵa mura bolyp kele jatqan tól ónerimiz dástúrli án, jyr-termelerdi, kúilerdi odan ári damytyp, óskeleń urpaqqa jetkizý.
Basqarma tóraǵasy Erlan Qarin: «Ár halyqtyń rýhani, mádeni álemi birinshi kezekte dástúrli ónerinen tanylady. Dástúrli án, terme, kúi bul bizdiń ata-babalarymyzdyń ǵasyrdan ǵasyrǵa jalǵasyp kele jatqan máńgilik úni, shejiresi. Ulttyq ónerimizdi búgingi jáne bolashaq urpaqqa nasihattaý, rýhani mura retinde saqtaý bizdiń paryzymyz. Ulttyq arnadan jaqynda shyǵatyn «Uly dala sazy» jobasy kórermenderimizdiń estetikalyq talǵamy men dúnietanymynyń damýyna óz úlesin qosatyn biregei joba bolatyny sózsiz. Jalpy mýzykalyq joba 17 kontsertten turady, ýzaqtyǵy 1 saǵat. Ulttyq arnadan 13 qańtardan bastap, 28 shildege deiin aptasyna bir ret ár jeksenbi keshki saǵat 21.05-te kórsetiletin bolady. «Uly dala sazy» jobasy 2018 jyldyń qarasha aiynda túsirilgen bolatyn, bul jobada 177 shaqty shyǵarma jazylyp, elimizdiń barlyq aimaqtarynan 91 ónerpaz qatysty. Onyń ishinde 16 termeshi, 34 kúishi, 39 ánshi, 2 jyrshy óz ónerin kórsetti. Endigi kezekte, osy jyldyń naýryz aiynyń basynda birinshi túsirilimge qatysa almaǵan birqatar ónerpazdardy taǵy da taspaǵa túsirýdi josparlap otyrmyz. Eń bastysy, bul jobadaǵy barlyq shyǵarmalar «Qazaqstan» Ulttyq arnasynyń «Altyn qoryna» enetin bolady», - dedi.
Aita keteiik, Ulttyq arnadaǵy «Uly dala sazy» jobasyna elimizdiń dástúrli óner maitalmandary Seken Turysbekov, Qajybek Bekbosynov, Bilál Ysqaqov, Ramazan Stamǵaziev, Sáýle Janpeiisova jáne t.b qatysady. Mýzykalyq jobada qazaq halqynyń ánderi men qazaq kompozitorlarynyń shyǵarmalary oryndalatyn bolady.
