Qazaqstan halqynyń tilderi kúni merekesi qarsańynda QR Ulttyq kitaphanasynda «Ulttar birligi – uly bailyq» atty shyǵarmashylyq festival uiymdastyryldy. Atalǵan is-sharany «Adyrna» ulttyq-etnografiialyq birlestigi Qazaqstan halqy Assambleiasymen birlese otyryp Almaty qalasy Ishki saiasat basqarmasynyń qoldaýymen ótkizdi.
Qazaqstan halqynyń birligi urany negizinde «Birlik – bereke bastaýy» atty jobanyń aiasynda ótken festival barysynda etnoaýyl kórmesi uiymdastyryldy. Kórmege etnomádeni ortalyqtardyń ókilderi ulttyq naqyshta bederlengen buiymdaryn qoiyp, ulttyq taǵamdaryn kópshilikke usyndy.
Sondai-aq, etnomádeni birlestikterdiń shyǵarmashylyq ujymdarynyń qoiylymy kórsetilip, ózge ult jastary arasynda «Til – tatýlyq tiregi» atty baiqaý bolyp ótti. «Adyrna» ulttyq-etnografiialyq birlestiginiń direktory Arman Áýbákirov: «Memleketimizdiń negizgi tiregi – qazaq ulty. Qazaqtyń mádenietin, ulttyq qundylyqtaryn nasihattap, elimizde turyp jatqan ult ókilderin qazaq etnosy aiasynda biriktirý maqsatynda osy shara ótkizilip otyr. Osyndai jumystardyń negizinde elimizde tatýlyqty, birlikti, dostyqty saqtai alamyz jáne bir-birimizge degen syilastyqtyń, yntymaqtyń qalyptasýyna osyndai festivaldar, baiqaýlar sebepshi bolady dep oilaimyn, - dedi.
Baiqaýdyń shymyldyǵy Chaikovskii atyndaǵy mýzyka kolledji stýdentteriniń ónerimen ashyldy. Saiysqa qatysýshylardy Ahmet Baitursynov atyndaǵy Til bilimi institýtynyń direktory, filologiia ǵylymdarynyń doktory, qazylar alqasynyń tóraǵasy Erden Qajybek quttyqtap, sáttilik tiledi.
Baiqaýǵa Erden Qajybek, Almaty qalasy Tilderdi damytý basqarmasynyń bas mamany Nurmuha Shaimerdenov, Temirbek Júrgenov atyndaǵy Qazaq ulttyq óner akademiiasy «Teatr óneri» fakýlteti, «Sahna tili» kafedrasynyń dotsenti Aigúl Naremgenova, «Ulan» gazetiniń bas redaktory Jadyra Narmahan, «Qamshy» aqparattyq agenttiginiń jetekshisi Bilál Qýanysh tórelik etti.
Saiysqa ózbek, orys, túrikmen, aýǵan, tájik, kúrd, uiǵyr, túrik, nemis ultynan 15 pen 30 jas aralyǵyndaǵy 10 talapker qatysyp, 3 kezeń boiynsha synǵa tústi. Birinshi kezeń boiynsha biyl 125 jyldyǵyn atap ótip otyrǵan Alash qairatkeri, aqyn Maǵjan Jumabaevtyń ólenderin jatqa oqý, ekinshi kezeń boiynsha «Ulttardy uiystyrǵan qazaq halqy» taqyrybynda esse oqý, úshinshi kezeń boiynsha óz ónerlerin kórsetý tapsyryldy. Qatysýshylardyń barlyǵy memlekettik tildi jetik biletinderin kórsetti. Qazaq tilinde taza sóilep, oilaryn erkin jetkize bilgen olar óz ónerlerin ortaǵa saldy. Baiqaý qorytyndysy boiynsha qazylar alqasynyń sheshimimen birinshi oryndy orys ultynyń ókili, QR Ulttyq Ulan qyzmetkeri Aleksandr Mamykin jeńip aldy. Upai sany boiynsha alǵa shyqqan Aleksandr noýtbýkke ie boldy. Ózbek qyzy, qazaq memlekettik qyzdar pedagogikalyq ýniversitetiniń stýdenti Ferýza Sultanmuratova ekinshi oryndy qanaǵat tutyp, planshet ielendi. Al úshinshi oryn túrik qyzy Rýsalina Asievaǵa buiyryp, fotoapparat berildi.
Rýsalina baiqaýdyń eń jas qatysýshysy boldy. Jasy nebary on beste. 9-shy synypty qyzyl attestatpen aiaqtap, 10-shy synypqa kóshipti. Almatydaǵy №22 mekteptiń qazaq synybynda oqidy. Anasy Farida Asieva qyzyn alǵashynda orys mektebine bergenin aitady. Alaida Rýsalina qazaqsha oqitynyn aityp, qiǵylyq salǵan soń qazaq synybyna aýystyrǵan eken. Sodan beri túrik qyzy túrli baiqaýlarǵa qatysyp, top jaryp keledi. Óziniń ana tilimen qosa qazaq, orys, aǵylshyn tilderinde erkin sóileidi.
«Mektepte alǵan bilimim, ata-anamnyń bergen tárbiesi, atamnyń ónegeli aqylynan meniń elime degen súiispenshiligim arta tústi. Osynda týyp-óskenime, memlekettik tilde sóilep, bilim alyp jatqanyma maqtanamyn. 9-shy synypty altyn attestatpen bitirgenime qýanamyn jáne 11-shi synypty da «Altyn belgige» bitirip, Astanadaǵy Nazarbaev ýniversitetinde bilim nárimen sýsyndap, elime paidasy tietin mamandyq iesi bolǵym keledi. Otanymyz – Qazaqstannyń árdaiym birlik pen tynyshtyqta ómir súrgenin qalaimyn», - dedi Rýsalina Alieva.
Baiqaýǵa qatysqan barlyq qatysýshylar alǵys hatpen jáne baǵaly syilyqtarmen marapattaldy. Is-sharaǵa Qazaqstan halqy Assambleiasynyń músheleri, ulttyq intelligentsiia, BAQ ókilderi, stýdentter men oqýshylar qatysty.
Aina TÓLEÝTAEVA
.jpeg)