Foto: QazNews24
Almaty politsiia departamenti Temirlan Eńsebekke qatysty is satiralyq basylymǵa bailanysty emes ekenin málimdedi, dep habarlaidy Ult.kz.
Vedomstvo Temirlan Eńsebekke qatysty sotqa deiingi tergeý qandai aiyptarmen qaralyp jatqanyn túsindirdi.
«Eń aldymen, bul istiń satiralyq basylymdaǵy jariialanymdarǵa qatysy joq ekenin atap ótkimiz keledi. Istiń qozǵalýynyń sebebi – búkil etnos ókilderin qorlaityn jáne ultaralyq alaýyzdyqty qozdyratyn mazmundaǵy materialdyń jariialanýy. Bul kópultty elimizde múlde jol berilmeitin áreket. Konstitýtsiia boiynsha eshkimdi shyǵý tegi, ulty, tili nemese dinine qarai kemsitýge bolmaidy», – delingen habarlamada.
Sonymen qatar, politsiia birneshe azamattyń ruqsat etilmegen jeke piketterge shyqqanyna bailanysty túsinikteme berdi.
«Quqyq buzýshyny qoldaý maqsatynda azamattar buqaralyq is-sharalardy ótkizýdiń belgilengen tártibin ádeii buzyp, ruqsatsyz piketke shyqty. Bul áreketter de quqyq buzýshylyq sanalyp, olar sot sheshimimen ákimshilik jaýapkershilikke tartyldy», – dep málimdedi politsiia departamenti.
Sonymen birge, politsiia «Ioý, orystar» ániniń avtoryn anyqtaý maqsatynda tergeý júrgizip jatqanyn habarlady.
«Qazirgi ýaqytta azamat E. Instagram paraqshasynda jariialaǵan ánniń avtorlaryn anyqtaý jumystary júrip jatyr», – delingen habarlamada.
Aita keteiik, satiralyq paraqshanyń avtory eki aiǵa qamaýǵa alynǵany týraly aqparat taraǵan edi. Osyǵan bailanysty, «Satira qylmys emes» degen plakatpen piketke shyqqan jýrnalist Ásem Jápisheva 15 táýlikke qamalǵan.
