Qazaqstannyń eńbek sińirgen qairatkeri, E. Ómirzaqov atyndaǵy Qostanai oblystyq filarmoniiasynyń basshysy Súndet Baiǵojin Qazaqstan halqyn karantin talaptaryn qatań saqtaýǵa shaqyrdy, dep habarlaidy QazAqparat.
«Qurmetti otandastar! Barshańyzǵa málim, elimiz qazir kúrdeli ahýaldy bastan ótkerýde. Ózim karantin belgilengen kúnnen bastap sanitarlyq talaptardy turaqty túrde saqtap kelemin. Ult saýlyǵy birinshi orynda bolýy kerek. Árqaisymyz ózimizdiń, jaqyndarymyzdyń densaýlyǵy men ómirine janashyrlyq tanytqanymyz abzal. Alaida, aramyzda indettiń bar ekenine senbeitin adamdar joq emes. Qanshama dos-jarandarymyz, týys-týǵandarymyz, dańqty tulǵalarymyz indettiń ilmegine ilinip, ómirden ótti. Sondyqtan árqaisymyz áleýmettik jaýapkershilikti sezingenimiz jón», - deidi «Qurmet» ordeniniń iegeri.
Osy oraida Súndet Baiǵojin daǵdarysty abyroimen eńserý úshin qaýipsizdik erejelerin qatań saqtap, engizilgen shekteýlerge asa joǵary jaýapkershilikpen qaraýǵa shaqyrdy.
«Qiyn kezeńnen aman-esen shyǵyp, qazaq óneriniń qara shańyraqtary esikterin aiqara ashyp, qalypty ómirge qaita oralatyn kúnge jeteiik», - deidi ol.
Sondai-aq, Súndet Baiǵojin álemdi alańdatqan indetke tosqaýyl bolyp, azamattarymyzdyń ómirine arasha túsip júrgen dárigerlerge alǵysyn jetkizdi.
