Áiel tili qysqa, keshirimpaz,
Ádebi nusqa, bilikti talǵampaz,
Otbasyn saqtai bilýde sabyrly,
Túsinistik pen ustamdylyqta shydampaz,
Ashý-urysqa túspeitin izdenimpaz,
Ósek-aiańǵa ermeitin ozyq tárbieli,
Azǵyndaýǵa barmaityn salmaqty,
Meiirim nuryn ainala tógetin aqyldy áiel,
Alashtyń tuqymyn kóktetip, órbitýge qumar,
Otbasyn qaitkende de baqytty etýge qushtar,
Adal ananyń aq ýyzyna tolyqqandy jaryǵan,
Inabatty, ibaly qyz, áiel, bul – eń dana áiel!
Bundai áiel – ult anasy bolýǵa eń laiyqty áiel!
Bundai tekti áieli bar qazaqtyń otbasy ónegeli,
Ul-qyzdary men nemere-shóbereleri ulaǵatty,
Qoǵamdyq ortada abyroi-bedeli asa joǵary,
Ómirlik baqyt juldyzy qashanda asqaq bolady.
Keleshegim, Alash uly men qyzdary, esińizge saqta!
Sizder eń aldymen bir-birlerińizdi minsiz dárejede janqiiarlyqpen qorǵai bilýge kelgende, qasterlei bilýdi ozdyra bilýge kelgende teńdesi joq ulttyq tulǵaǵa ainalýǵa, kemeńger pana bolýǵa airyqsha mindettisizder. Adasýǵa eshqandaida qaqymyz joq. Óitkeni, Ar aldynda – Dar aldynda tursyzdar. Buny óle-ólgenshe umytpa! Bul – bir. Ekinshiden, ulttyq namysty minsiz qorǵai bilýde, ardy kirshiksiz saqtai bilý de, otbasyn baqytty ete bilý de – erlik! Úshinshiden, tekti kóregendik pen esti kisilikke laiyq danalylyǵy men ónegesi zor, ulaǵaty mol, izdenimpaz da kemeńger áke-sheshe bola bilý, qaldyrǵan izi urpaqqa ónege, ósieti úlgi, abyz ata-ájege ainala bilý – naǵyz kemeldik! Tórtinshiden, ótken ata-babalarmen emes, endigi jerde, HHI ǵasyrda tek tekti, jan-jaqty bilimdi, bilikti, kemeńger tulǵa etip órbitken ul-qyzdarymyzben, nemere-shóberelerimiz, shákirtterimizben ǵana álem aldynda tik turyp maqtana alatyn, marqaia alatyn altyn úrdisterdi tezirek ornyqtyryp, ozdyra bilý – kósegeni kórkeitetin kósemdik! Besinshiden, kúlli ult, halyq, urpaq aldyndaǵy qaryzymyz ben paryzymyzdy minsiz dárejede ótei bilý – qyl kópirden súrinbei tek qana asa airyqsha mártebeli abyroimen óte bilý ekenin eshqashanda umytpa, altyn keleshegim! Altynshydan, «Qazaq eli, álemdik 30 eldiń qataryna, tek qana 30 million qazaqpen qosyl!» pármendi ulttyq uly usynysty júzege tezirek asyrý maqsatynda bárimiz de judyryqtai jumylyp, erekshe janqiiar belsendilikpen at salysý – bar qazaqtyń aldynda turǵan eń altyn ári uly mindet! Jetinshiden, qazaq halqy tek kóshbasshy bolýǵa laiyq kemeńger ul-qyzdardy qaýlata bilýge ǵana jaralǵan!
Qazaqtyń sanynyń ósýi de, óshýi de, ultyn janyndai erekshe kúimen súie biletin, patriottyq rýhy asqaq, tekti qyz-kelinshekterdiń erekshe múddeli belsendiligi men qajymas qajyrlylyǵyna bailanysty.
Imanǵa, táýbeńe kel, aiaýly arý, súiikti qyz-kelinshekter!
Sizder qoǵamnyń gúlisizder! Erte solmańyzdar, ult keleshegin tereń oilańyzdar. Sizder eń meiirimdi apa, janashyr qaryndas, máńgilik asyl jar, aiaýly da ardaqty ana, ónegeli altyn ájesizder. Jańa ǵasyr – jańashyl jasampazdyq pen bastamashyl jańa patriottyń airyqsha belsendiligin kútedi. Otbasynda óz erlerińizdi qasterlep, qurmettei bilińizder, súiińizder. Qoǵamdy, ásirese erkekti tereń tebireniske, jańa silkiniske túsire otyryp, birge syrlasyńyzdar! Bir-birlerińizge ainymas janqiiar tirek, sýyspas máńgilik súienish bola bilińizder. Adamzatta kópbalaly bola bilý, teńdesi joq eń igilikti uly isterdiń ishindegi áiel baqyty – álemdik uly baqyt!
Ómirge bala ákelý – ómir men ólimniń arpalysqan sáttegi eń qaýipti qyl kópirli tajalynan aman qalý, keiin olardy qajymas izdenimpaz iskerlikpen aiaǵyna turǵyzyp, kóregen kemeldikpen san salaǵa samǵata bilý – kózsiz eren erlik ekenin jaqsy túsinemiz.
Alaida soǵysta batyr bolý – bir sáttilik, ýaqytsha ǵana batyr. Adal, shyn batyr – ómir boiyna, óle-ólgenshe janqiiar halyqshyl, shynshyl, týrashyl, kúresker, qairatker bolady. Búkil el, ult, urpaq, shákirtti baqytty ete bilý maqsatynda ómirlik shyndyq úshin shaiqasyp, aqiqat úshin aiqasyp, attan bir sátke de túspei táýelsiz eldik úshin alysyp ótedi. Qaharman batyr – kúresker batyrlyq pen printsipshil asyl azamattyqtyń ozyq úlgi-ónegelerin búgingi jáne keleshek ul-qyzdarymyz ben nemere-shóberelemiz, shákirtterimiz úshin únemi jetildire otyryp, quryshtai shyńdap, ozdyryp ótedi.
Al Sizder, aq jaýlyqty analar, máńgi qaharman batyrsyzdar! Sizder janqiiar kúidegi kúreskersizder! Sizder qajymas qaisar qairatkersizder! Sizder ómirlik qaharman batyr bola bilýdiń altyn simvolysyzdar! Kópbala órbite bilý danalyǵyn ozdyra túsińizder!
Qoryta kelgende aitarymyz: «Shyǵarmashylyq iesiniń baqyty – taqyrybyn tabýmen bailanysty» demekshi, Uly Dalanyń qazaq urpaǵynyń, ásirese arýlarynyń eń uly maqsaty – HHI ǵasyr sahnasynda óz dara jolyn qapysyz taýyp, dana joldyń sara arnasyna túsip, qazaq degen Máńgilik eldiń Kókbairaǵyn jelbirete bilý, bútkil el, ult, urpaq, otbasy mártebeli abyroiy men merekeli mereiin kókke asqaqtatý baǵytynda álem jurtshylyǵyn tańqaldyrmai qoimaityn dárejede bola bilý bolsa kerek.
Olai bolsa, osynaý uly jolda aianbai ólsheýsiz ter tógip, eleýli úles qosyp, Qazaq eliniń bolashaǵyn baiandy etý, Táýelsiz eldigimizdi tuǵyrly qyp, máńgilik órkenietti el bop qalyptasa bilýdiń jolynda namysty janyp, minezdi túzep, birimizdi-birimiz ónegeli qaisar belsendilikpen únemi qamshylap, jańasha ozyq ta ónegeli, úlgili ómirmen alǵa nyq qadam basýymyz qajet!
Kósegesi kógerip, kórkeiip, gúldengen irgeli el bolamyz desek, erin qasterlei bilýde jaman aty shyqpaityn tárbieli, kórkem minezdi, ibaly, inabatty qyzdy, otbasyna minsiz qorǵan bola bilýge laiyq kúreskerlik ónegesi zor, kemel uldy qaýlata bileiik, qazaq!
Bul áke-sheshe men ata-áje úshin teńdesi joq mártebeli abyroi jáne eki dúnieniń de eń jarqyn baqyty!
Moldaǵali Matqan
Qazaqstan Jýrnalister Odaǵynyń múshesi
