Qazaqstan Respýblikasynyń Memlekettik keńesshisi Erlan Qarin álemde bolyp jatqan qaqtyǵystar týraly pikirin aitty, - dep habarlaidy Massaget.kz.
Jýrnalist Nartai Aralbaiulyna bergen suhbatynda ol iadrolyq qarýǵa qatysty suraqqa jaýap berdi.
"Men uzaq jyldar boiy qaýipsizdik máselelerimen ainalysyp keldim. Terrorizm máselesimen ainalysyp júrdim. Sol kezderde Aýǵanstanǵa nemese qaqtyǵys bolyp jatqan basqa elderge jii baratynmyn. Aýǵanstannyń ózine 5-6 ret barǵan shyǵarmyn. 2016 jyl bolatyn. Taiaý Shyǵysta, Aýǵanstanda, Ońtústik-Shyǵys Aziiada, Resei men Ýkraina arasynda ne bolyp jatqanyn kórip júrdim. Sol kezde kúndeligime "Álemge úlken daǵdarys kele jatyr. Úlken bir apat kele jatyr" dep jazǵanmyn. Sebebi qarama-qaishylyqtar jinalyp qaldy. Bul qarama-qaishylyqtar úlken shieleniske alyp keledi.
Bir alyp memleket keiingi 10 jylda óziniń áskeri biýdjetin 76 paiyzǵa ósirgen. Qazirgi ýaqytta álemdegi áskeri shyǵyndardyń biýdjeti 2 trillionnan asady. Jyl saiyn birneshe paiyzǵa ósip jatyr. Iaǵni, alpaýyt elder arasynda qarama-qaishylyqtar tereńdep bara jatyr. Biz muny eskerýimiz kerek. Qazaq qoǵamyna geoiasi taldaý jetpeidi. Biz ishki máselelermen shektelip, syrtqy jaǵdailardy esepke almaimyz. Biz bárinen oqshaý ómir súrip jatqan siiaqtymyz", - dedi Qarin.
