Almaty oblysy ákimi Amandyq BATALOVTYŃ jáne Úlken Almaty ainalma avtokólik jolyn salatyn merdiger kompaniia ókilderiniń qatysýymen taǵy bir qomaqty jobanyń tusaýy kesildi. QR Investitsiia jáne damý ministrligi Avtokólik joldary komitetiniń tapsyrysy boiynsha qolǵa alynǵan jobany túrkiialyq jáne koreialyq qurylys kompaniialary seriktesip júzege asyrady.
Mamandardyń aitýynsha, bul ǵasyrlyq mánge ie joba bolyp otyr. Olai deitini, aimaq aýmaǵynan «Uly Jibek joly» sorabymen kerýen tartyp ótetin Batys Qytai – Batys Eýropa kúrejoly ótedi. Sonyń ishinde Almaty qalasy arqyly ótetin kólikterdiń irkilissiz qatynaýy airyqsha mańyzǵa ie. Mine, osy máseleniń kúrmeýin sheship, túiinin tarqatar sheshim – mańyzdy jobanyń qolǵa alynýy bolsa, atalǵan jol qurylysynyń biyl bastalýy da elimiz úshin úlken jańalyq.
Osy rette, investorlarmen kezdesip, emen-jarqyn áńgimelesken Amandyq Ǵabbasuly:
– Ótken jyly Almaty oblysynyń ekonomikasyna 567 mlrd. teńge investitsiia tartylsa, bir ǵana Úlken Almaty ainalma avtokólik jolynyń qurylysyna quiylǵan investitsiia 512,3 mlrd. teńgeni qurady. Bul – shyn mánindegi óńirdiń ekonomikalyq áleýetin kóterip, áleýmettiń tirshiligine serpin beretin joba bolady, – dedi.
Jobany iske asyrý úshin oblystyq ákimdik jol qurylysyna kerekti qosalqy material daiyndaityn, tas úgitip, tsement pen asfalt shyǵaratyn zaýyttardy ornalastyrýǵa qajetti jerlerdi anyqtap beredi. Osy arqyly merdiger kompaniianyń belsene jumysqa kirisýine jaǵdai jasalǵan. Búginde joldy salyp bitirýdiń naqty merzimi de belgilengen. Naqtyraq aitqanda, 2018 – 2021 jyl aralyǵyna josparlanǵan. Jalpy uzyndyǵy 66 shaqyrymǵa sozylatyn alty jolaqty, 1 «a» kategoriiaǵa jatatyn jol boiynda 41 kópir, 7 jol aiyryǵy salynady. Joba paidalanýǵa berilgende ainalma joldan táýligine 40 myńǵa jýyq kólik ótse, tolyq qýattylyǵyna engende 100 myńnan asa kóliktiń irkilissiz qatynaýyna múmkindik týmaq.
Múmkindik demekshi, kezdesý barysynda shetel kompaniiasy ókilderi kúrdeli injenerlik jumysty atqaratyn mamandardan basqa 90 paiyz jumysshyny jergilikti turǵyndardan alatynyn atap ótti. Odan ári eki tarap ta ózderiniń bul jobaǵa naqty daiyn ekendikterin tilge tiek etti.
– Jospar boiynsha biyl daiyndyq jumystaryn aiaqtap, kelesi jyldan jol salýǵa qarqyndy kirisemiz. Bári oidaǵydai bolsa, 2021 jyly joldy tapsyramyz. Oǵan qýatymyz da, múmkindigimiz de jetkilikti. Mundai aýqymdy jobany Qazaqstanda birinshi ret qolǵa alyp otyrǵanymyzben basqa elde birneshe márte júzege asyrdyq, tájiribemiz jetkilikti, – deidi «Alsim Alarko» AQ-nyń vitse-prezidenti Abbas Shahin.
Aita keteiik, Qarasai, Ile, Talǵar siiaqty úsh aýdannyń aýmaǵyn kesip ótetin ainalma joldyń jobasy 2013 jyly qolǵa alynǵan bolatyn. Almaty qalasynyń aýmaǵy ulǵaiyp, kórshi aýdandardyń jer telimderi qalanyń territoriiasyna kirýine bailanysty joba qaita qarastyryldy. Osy ýaqyt aralyǵynda jol ótetin jer telimderin jekemenshikten memleket menshigine ótkizý jumysy júrgizildi. Qazir ainalma jol ótetin aýmaqqa ornalasqan 722 jer telimi memleket menshigine qaitaryldy. Bul jerde turǵyn úi, saýda ortalyqtary, egistik alqaby, mekemelerdiń ǵimaraty, óndiris ortalyǵy siiaqty nysandar bolǵandyqtan kóptegen qiyndyqqa jolyqsa da jol qurylysyna kedergi keltiretin sebepterdiń bári joiyldy.
Qozybai QURMAN,
Almaty oblysy
