Kelesi jyldan bastap Elbasynyń tapsyrmasyna sáikes kásiptik jáne texnikalyq bilim tegin beriletin bolady. Sondai-aq, jumysshy mamandyǵynda oqityndardyń barlyǵy shákirtaqy alady. Bul týraly búgin Parlament Májilisinde «Barshaǵa arnalǵan aqysyz texnikalyq jáne kásiptik oqý, dýaldi oqytýdy engizý» atty jiynda QR Bilim jáne ǵylym ministrligi Texnikalyq jáne kásiptik bilim departamenti basqarma basshysynyń orynbasary Ernat Júnisov aitty, dep habarlaidy Baq.kz tilshisi.
"Búgin Májiliste eki másele qaraldy. Birinshisi - texnikalyq jáne kásiptik bilimdi tegin berý, ekinshisi - dýaldi oqytýdy engizý. Elbasy keler jyldan bastap kásiptik bilimdi tegin berý týraly tapsyrma bergen bolatyn. Ministrlik osy baǵytta jumys istep jatyr.Búgingi tańda Úkimet tarapynan jumys toby qurylǵan. Bes otyrys ótkizildi. Jaqynda bolǵan jiynda jergilikti atqarýshy organdarmen qarajat máselesin qaitadan qarastyrý tapsyryldy. Jyldyń aiaǵyna deiin bul máseleni tolyq talqylaityn bolamyz", - dedi Ernat Ǵafýuly.
Departament basshysynyń orynbasary bul jobanyń negizgi tetikterine toqtalyp ótti.
"Jumysshy mamandyqtary tegin oqytylady. Muny Bilim týraly zańnyń segizinshi tarmaǵyna engizdik. Jumysshy mamandyǵyn alatyndar sanyn arttyrý maqsatynda oqý baǵdarlamalaryn ázirledik. Osy maqsatta respýblikalyq biýdjettiń esebinen 21 myń mamanǵa oryn bólýdi kózdep otyrmyz. Qalǵan oryndy jergilikti biýdjet esebinen qarastyrmaqpyz. Birinshi kezekte mektep bitirip oqýǵa túspegen jastardy qamtýdy kózdep otyrmyz. Sondai-aq, ózin-ózi jumyspen qamtyǵan jastarǵa da múmkindik beriledi. 9 ben 11 synyp bitirgen túlekter bizdiń tegin kásiptik jáne texnikalyq bilim berýimizge qatysa alady", - deidi ol.
BǴM ókili jumysshy mamandyǵynda oqityndardyń barlyǵy bir mezgil tegin tamaqpen jáne shákirtaqymen qamtamasyz etiletinin aitty.
"Buryn jumysshy mamandyqqa túsetinder tegin tamaqpen qamtamasyz etiletin. 2012 jyldan beri bul toqtatylyp qaldy. Endi sony qaita bastaý máselesi sheshilip jatyr. Jumysshy mamandyǵyna túsetinder aldaǵy ýaqytta bir mezgil tegin tamaqtana alady. Osy ýaqytqa deiin tek jaqsy oqityndarǵa stipendiia berip kelsek, endi úlgerimi tómen stýdentterge de shákirtaqy beriletin boldy", - dedi Ernat Júnisov.
.jpeg)