«Atameken» Ulttyq kásipkerler palatasy basqarma tóraǵasynyń mindetin atqarýshy Nariman Ábilshaiyqov Daǵdarysqa qarsy is-sharalar jónindegi jedel shtabtyń jumysy týraly aityp berdi, dep habarlaidy QazAqparat.
«Eldegi jaǵdai jalpy turaqty. Biraq ta jaqyn kórshiles eldegi jaǵdai (Resei men Ýkraina arasyndaǵy másele) basqasha, soǵys saldaryn bárimiz kórip otyrmyz. Bul suraqqa saiasi turǵydan emes, ekonomikalyq jaǵynan qarasaq, bul ahýal shaǵyn kásipkerge qandai ziianyn tigizedi, iaǵni sanktsiialar (Reseige qatysty) Qazaqstanǵa qandai áser etedi degen másele boiynsha túsindirip óteiin. Kesheden bastap jedel shtab óz jumysyn bastady. Osy eki kún ishinde 200-den astam habarlama kelip tústi. Atap aitqanda, kóktemgi egin egý jumystaryna daiyndalyp jatqan kásipkerler Ýkrainadan tehnika bólshekterine jáne basqa ónimderge tapsyrys bergenderin aityp jatyr. Bul máselelerdi el óńirlerinen kóterip jatqan kásipkerler bar», - dedi N. Ábilshaiyqov áleýmettik jelidegi onlain brifing barysynda.
Osy oraida ol kóterilip jatqan máseleler óte mańyzdy ekenin atap ótti.
«Sońǵy 10 kún ishinde kórshiles Reseige 50-den astam sanktsiia salynǵan. Bul sanktsiiany salý úshin bir ǵana qujat kerek, al onyń kúshin joiýǵa birtalai jyldar qajet. Osyndai qiyn-qystaý kezeńde Qazaqstan kásipkerleriniń múddesin qorǵaý maqsatynda jedel shtab jumysyn bastady. Keshe tańerteńnen beri bizdiń áriptester árbir oblystaǵy, aýdandaǵy, aýyldaǵy problemalar jaiynda málimet alýda. Osy málimetterdiń barlyǵyn Úkimetke jetkizip jatyrmyz. Sondyqtan bul shtab prblemalardy sheshkenshe jumysyn jalǵastyrady», - dedi N. Ábilshaiyqov.
Budan buryn habarlanǵandai, AQSh Elshiliginiń baspasóz qyzmeti Reseige qarsy salynǵan sanktsiialardyń Qazaqstanǵa áseri týraly pikir bildirdi.
«Ýkrainadaǵy jaǵdai jyldam órbip jatyr. Sondyqtan qazirgi tańda uzaq merzimdi sharalar men olardyń saldary týraly aitý qiyn. Alaida, AQSh sanktsiialary Resei ekonomikasyna baǵyttalǵanyn jáne basqa elderdiń, sonyń ishinde Qazaqstannyń ekonomikasyna áserin jumsartý jaǵy eskerilgenin atap ótkimiz keledi. Sondai-aq aradaǵy áriptestiktiń 30 jylynda biz Qazaqstannyń ekonomikasyn ártaraptandyrýǵa jáne nyǵaitýǵa kómektesý baǵytyn ustanyp kelemiz», - delingen Elshiliktiń jaýabynda.
