11 qyrkúiekke qaraǵan túni Zaporoje atom elektr stantsiiasynyń jumys istep turǵan sońǵy blogy energiialyq jelilerden ajyratyldy. Qazir blokty sýytyp, salqyn kúige aýystyrý jumystary júrip jatyr. Bul týraly Ýkrainanyń "Energoatom" kontserni habarlady, dep jazady Azattyq.
AES Zaporoje oblysy Energodar qalasynda ornalasqan. Ýkrainanyń bul qalasyn Resei kúshteri baqylaýda ustap otyr. Altynshy energiialyq bloktyń toqtaǵanyn okkýpatsiialyq ákimshilik te rastady.
"Energoatomnyń" málimetinshe, keiingi úsh táýlikte altynshy energiialyq blok stantsiianyń tek óz muqtajdyǵyn óteý úshin jumys istegen. Vedomstvonyń habarlaýynsha, Reseidiń atqylaýynan stantsiiany Ýkraina energiia júiesimen bailanystyratyn jelilerdiń bári zaqymdanǵan. Al Resei bolsa, atysty Ýkraina áskeri júrgizip otyr deidi.
Zaporoje AES-inde jaǵdaiǵa bailanysty BUU men álemniń kóptegen eli alańdaýshylyq bildirdi. Munyń aldynda stantsiiaǵa MAGATE missiiasy kelgen. 6 qyrkúiek kúni uiym stantsiiadaǵy jaǵdai jóninde esebin jariialaǵan. MAGATE inspektorlary birqatar kemshilikterdi atap ótken. Sonyń ishinde, óńdelgen jáne jańada óndirilgen iadrolyq janarmaidy saqtaý qoimasynyń búlingenin málimdegen. Mamandar sondai-aq stantsiia aýmaǵynda Reseidiń áskeri tehnikasy turǵanyn aitqan. Aýmaqtyń atqylanýyna inspektorlardyń ózderi de tap bolǵan, biraq olar atysty kim júrgizip otyrǵanyn aitpady.
MAGATE óz esebinde stantsiia tóńiregindegi aýmaqty «qaýipsizdigi aimaǵy» dep jariialaýdy usyndy. Agenttik stantsiiany atqylaýdy toqtatýǵa shaqyryp otyr. Áitpese iadrolyq apat bolýy yqtimal deidi olar.
Ýkraina stantsiiadan áskeri kúshterdi tolyq áketýdi talap etip otyr. Muny Eýroodaq pen AQSh qoldady. Resei bul talapty oryndaýdan túbegeili bas tartyp otyr. Resei syrtqy ister ministrliginiń aitýynsha, bulai jasasa, stantsiiaǵa tóner qaýip kúsheie túspek.
