QR Syrtqy ister ministrligi men shet elderdegi mekemeleri Qazaqstan azamattaryn Ýkrainadan evakýatsiialaý jumysy bastalǵannan beri 431 azamatqa, onyń ishinde Polshaǵa – 404 adamǵa, Moldovaǵa – 21 adamǵa, Majarstanǵa – 5 adamǵa, Slovakiiaǵa – 1 adamǵa shyǵýǵa járdem kórsetti. Qazaqstandyq diplomattar joǵaryda atalǵan memleketterdiń shekarasynan ótýdi, azamattardy jinaýdy jáne Qazaqstanǵa odan ári jetýdi qamtamasyz etedi, dep habarlaidy "Ult aqparat".
«Air Astana» áýekompaniiasynyń eki evakýatsiialyq ushaǵy 299 adamdy shyǵaryp úlgerdi, olar Katovitse qalasynan (Polsha) Almaty men Nur-Sultan qalalaryna jetti. Sonymen qatar, ú.j. 3 naýryzda úshinshi evakýatsiialyq ushaqty jiberý pysyqtalýda.
Qazirgi ýaqytta Katovitse qalasynda 68 QR azamaty elge oralýyn kútýde. Buǵan deiin shekarany ótken birqatar azamattar EO aýmaǵynda qalýǵa sheshim qabyldady. Sonymen qatar, azamattarymyzdy ýkrain-poliak shekarasyna jetkizý úshin Kievten 57 adamǵa jáne Lvovtan 41 adamǵa sapar uiymdastyryldy.
«Atameken» UKP bergen aqparatyna sáikes, Ýkrainadaǵy áskeri shielenis bastalǵannan keiin el aýmaǵynda 47 júrgizýshi – QR azamattary jáne 8 júrgizýshi – shet memleketterdiń azamattary bar jalpy 55 birlik avtokólik qaldy.
Qazirgi tańda qazaqstandyq diplomattardyń kómegimen 55 avtokólik quraldarynyń ishinen júrgizýshilermen birge 13 avtokólik ýkrain-reseilik shekarasy arqyly Resei aýmaǵyna, 8 avtokólik Moldovaǵa jáne 3 avtokólik Polshaǵa shyǵýǵa qolǵabys kórsetildi. Qolda bar derekter boiynsha, qazaqstandyq tasymaldaýshylardyń 31 avtokólik quraly Ýkraina aýmaǵynda qaldy.
Azamattardyń jáne júk tasymaldaýshylardyń ornalasqan jerine bailanysty QR-dyń Reseidegi, Belarýstegi, Polshadaǵy, Slovakiiadaǵy, Majarstandaǵy, Rýmyniiadaǵy jáne Moldovadaǵy sheteldik mekemeleri olarmen turaqty bailanysta jáne bolý eliniń biligimen bul aýmaqtar arqyly evakýatsiialaýdy pysyqtaýda, sondai-aq neǵurlym qaýipsiz evakýatsiialyq joldardy usynýda.
