Reseidiń Astrahan oblysy Krasnoiarsk aýdany Vatajnoe aýylynyń týmasy Áli Sabyrjanuly Batyrovtyń Ýkrainadaǵy soǵysta mert bolǵanyn týǵan aýylynyń ákimshiligi habarlady. 2 naýryzda nemere qaryndasy Elsiiar Batyrova baýyrynyń qazasyn rastady. Onyń sózinshe, Áli Batyrov 28 aqpan kúni opat bolǵan, dep jazady Azattyq.
Aýyl ákimshiliginiń habarlaýynsha, Batyrov maior áskeri sheninde bolǵan jáne batalondy basqarǵan. Ýkrainaǵa deiin ol Siriiadaǵy soǵysqa qatysqan, sol úshin Batyldyq ordeni men birqatar ózge medal alǵan.
Áli Batyrovtyń aty-jóni Ýkrainaǵa jiberilgen Resei sarbazdarynyń tiziminde bar. Tizimdi 1 naýryz kúni ýkrain hakerleri jariialaǵan.
Batyrov – tómengi Edil boiyn mekendegen halyq arasynda qaza tapqany resmi moiyndalǵan ekinshi adam. 1 naýryzda Astrahan oblysynyń gýbernatory Igor Babýshkin sol aýdannyń týmasy Arman Narynbaevtyń qaza tapqanyn málimdegen.
Bilik tek eki sarbazdyń ólimin rastaǵanymen, jergilikti turǵyndar qaza tapqandar men iz-tússiz joǵalǵandar kóp deidi. Astrahan oblysynan shyqqan sarbazdardyń opat bolǵany týraly habarlar aýdandyq chattarda tarap jatyr. Volodar aýdanynda turatyn bir adamnyń aitýynsha, aýdanǵa tsinkpen qaptalǵan alty máiit kelgen. Volodar da, Krasnoiarskide de kóbine qazaqtar turady.
