2021 jylǵy 26 mamyrda, Ýkrainanyń astanasy Kiev qalasynda, Ýkrainadaǵy qazaq diasporasynyń quryltaiy ótti. Quryltaiǵa osy elde turatyn qandastar men Qazaqstannan delegattar qatysty. Quryltaiǵa qatysýshylar atamekeni Qazaqstandaǵy júrgizilip jatqan saiasi, ekonomikalyq, mádeni reformalarǵa qoldaý bildirip, dúnie júzindegi qandastarymyzǵa arnaiy úndeý joldady.
ÝKRAINADAǴY QAZAQ DIASPORASYNYŃ
OTANDASTARǴA ÚNDEÝI
Qymbatty otandastar!
2021 jyl – bizdiń Atamekenimiz Qazaqstannyń tarihy men taǵdyryndaǵy eń eleýli, asa mańyzdy jyl. Biyl Qazaqstan Respýblikasynyń Táýelsizdigine 30 jyl tolyp otyr.
Adamzat tarihy úshin, otyz jyl az ýaqyt kóringenimen, bizdiń halqymyz úshin osy bir taǵdyrly ýaqyt mejesi otyz ǵasyrǵa tatidy. Biz san jyldar boiy ata-babalarymyz ańsaǵan, sol jolda qanyn tógip, janyn qurban etken bostandyqqa qol jetkizdik.
Uly Dala tósinde kók bairaǵy jelbiregen, tórtkúl dúnie túgel moiyndaǵan, Birikken Ulttar uiymyndaǵy barlyq memlekettermen terezesi teń, keregesi keń Qazaq memleketi saltanat qurdy. Bul barsha qazaqstandyqtar úshin, ásirese, týǵan elden jyraqta júrgen bizder úshin kóńil tolqytar, júrekjardy uly oqiǵa ári baǵa jetpes qundylyqqa ainaldy.
1992 jyldyń qyrkúiek aiynda, I Dúniejúzi qazaqtarynyń quryltaiynda, alty qurlyqqa tarydai shashylyp ketken qandastarymyzdyń basy qosylyp, baýyry bútindeldi. Sol alǵashqy Quryltaida Elbasy N.Á.Nazarbaev «Baýyrlarǵa qushaǵymyz aiqara ashyq» degen ataqty baiandamasyn jasap, shette júrgen qandastarymyzdy tarihi Otanyna oralýǵa shaqyrǵan edi. Búginde millionnan astam qandas baýyrlarymyz Atamekenine oralyp, týǵan eli men jeriniń bolashaǵy úshin aianbai eńbek etip jatyr.
Ýkrainadaǵy qazaq diasporasy da óz Atamekeninen eshqashan qol úzgen emes. Biz qazirgi kezde Qazaqstannyń Ýkrainadaǵy elshiligi arqyly da tarihi Otanymyzben, álemniń basqa elderindegi qazaqtyń qoǵamdyq uiymdarymen tyǵyz qarym-qatynas ornatyp otyrmyz.
Sonaý 1994 jyldyń ózinde Kiev qalasynda «Dostyq» qazaq mádeni ortalyǵyn ashýǵa qol jetkizdik. Sonymen qatar, Harkov qalasynda qazaqstandyqtardyń «Birlik» qoǵamdyq uiymy turaqty jumys istep keledi. Kievtegi, uly aqynymyz Jambyl Jabaev atyndaǵy qoǵamdyq kitaphana da Ýkrainadaǵy qazaqtardyń rýhani ortalyǵyna ainalǵan. Ótken jyly «Otandastar» qorynyń qoldaýymen «Abai» mádeni-iskerlik úii ashyldy.
Biz óz balalarymyzǵa, nemerelerimizge ultymyzdyń salt-dástúrin, tili men dilin úiretip, tarihyn, mádenieti men ádebietin nasihattaýdy perzenttik boryshymyz dep sanaimyz.
Ýkrainadaǵy qazaq diasporasynyń quryltaiy osyndai aýqymdy da mańyzdy maqsat-murattardy kózdeidi. Biz Qazaqstan men Ýkraina arasyndaǵy saiasi, ekonomikalyq, gýmanitarlyq ózara bailanystyń budan ári de qarqyndy damyǵanyn qalaimyz jáne osy jolda qazaq-ýkrain halyqtary dostyǵynyń «altyn kópiri» bolǵymyz keledi!
Qadirli qandastar!
Sońǵy eki jyl barsha álem halqy úshin aýyr synaq pen boljaýsyz táýekelder ýaqyty boldy. Tótennen kelgen koronovirýs derti bizdiń aiaýly Atamekenimizdi de ainalyp ótken joq. Osy oraida, biz – jyraqta júrgen qandastar Qazaqstannan jetetin árbir aqparatqa, árbir jańalyqqa qulaq túrip, eleńdep otyrmyz.
Týǵan Otanymyz bul synaqtan da abyroimen shyǵatynyna, onyń bolashaǵy jarqyn da jasampaz bolatynyna kámil senemiz.
Táýelsiz Qazaqstannyń ár jetistigine, ár jaqsylyǵyna júregi jaryla qýanatyn aldymen bizder, ózderińizdiń baýyrlaryńyz ekenin de riiasyz kóńilmen jetkizgimiz keledi.
QR Prezidenti Q.K.Toqaev aitqandai – «Táýelsizdik bárinen qymbat». Atameken – Qazaqstanymyzdyń táýelsizdigi máńgilik bolsyn!
Halqymyz aman-esen, kók aspanymyz ashyq, tirligimiz beibit te berekeli bolsyn!
Biz Sizdermen árdaiym birgemiz!
Ýkrainadaǵy qazaq diasporasynyń
Quryltaiyna qatysýshylar
