Qazaqstannyń Ýkrainadaǵy tótenshe jáne ókiletti elshisi Darhan Káletaev qazaqstandyqtardy evakýatsiialaýǵa qatysty jaǵdaidy aitty, - dep habarlaidy Tengrinews.kz.
Darhan Káletaevtyń aitýynsha, Ýkrainadan eki reis kelgen, taǵy bir reis 3 naýryzǵa josparlanǵan.
"Air Astana rastady. Qazir Polshada 74 adam bar. Sondai-aq, Kievten 41 qazaqstandyq mingen avtobýs kele jatyr. Lvovta 40-tan astam adam. Barlyǵy 150-160 qazaqstandyq reisti kútip otyr", - dedi ol.
Elshi Harkovtan barlyq qazaqstandyq stýdent ketkenin aitty. Onyń aitýynsha, alty balasy bar qazaqstandyq otbasy Odessadan shyǵa almai otyr.
"Birinshiden, syrqat enesi bar. Ekinshiden, qujattary durys emes. Elestetip kórińizshi, alty balasy bar. Aqshalai kómek berdik, sondai-aq Arýjan Sainǵa da júgindik. Otbasyǵa kómektesý úshin halyqaralyq qorlarmen kelissózder júrgizip kórýin ótindik", - dedi Darhan Káletaev.
Káletaevtyń aitýynsha, qazirgi ýaqytta qazaq diasporasyn evakýatsiialaý máselesi bar.
"Barlyq jerde jarylys. Diaspora ókili telefon soǵyp, ne isteitinin surap jatyr. Otandastarymyz ǵoi, qalai tastap ketemiz. Qazir maǵan diaspora basshysy Daniiar keledi, olarda komendanttyq saǵaty endi ǵana bitti. Birge otyryp san jáne basqa da máselelerdi qaraimyz", - dep bólisti elshi.
