Ýkrainanyń Kiev oblysynda tabylǵan maidanger Qaiyrjan Tikshekeevtiń súiegi týǵan jeri Soltústik Qazaqstan oblysy Dáýqara aýylynda qaita jerlendi, dep habarlaidy "Ult aqparat".
Qaiyrjan Tikshekeev Ekinshi dúniejúzilik soǵys kezinde habar-osharsyz ketkenderdiń sanatynda boldy. Biyl naýryz aiynda jaýyngerdiń týǵan-týystaryna Ýkrainadan habar jetti. Sondaǵy «Vertikal» atty izdeý bólimi Kiev oblysy Makarov aýdanynda bir top maidangerdiń súiegin tapqan. Sonyń ishinde soltústikqazaqstandyq jaýynger de bolypty.
«Atamyzdan 1941 jyly habar úzilgen eken. Qaiyrjan atamyzdy ájemiz ómir boiy izdedi. Týystarymyz Máskeýge de bardy. Odan keiin ákem 2004 jyly marqum bolǵansha izdedi. Onyń amanaty maǵan qaldy. Seksen jylǵa jýyq izdedik. Ýkrainadaǵy izdeýshi topqa, «Atamnyn Amanaty» qoǵamdyq birlestigine jáne Aiyrtaý aýdanynyń ákimdigine, aýdandyq Qorǵanys isteri jónindegi bólimge jáne aýyldastaryma, basqa da kómekteskenderge alǵysymdy bildiremin», – dedi jaýyngerdiń nemeresi Marat Tikshekeev.
Qaiyrjan Tikshekeev 1916 jyly Aiyrtaý aýdany Dáýqara aýylynda dúniege kelgen. Ol 1940 jyly aqpanda áskerge alynyp, alǵashqylardyń biri bolyp soǵysqa kirisedi. 1941 jyly Kievti qorǵaǵan 28-shi atqyshtar diviziiasynyń quramynda bolǵan.
Ýkrainany azat etýge qatysyp, sol jerde mert bolǵan jaýyngerdiń súiegin týǵan elge jetkizýge qazaqstandyq «Atamnyn Amanaty» qoǵamdyq birlestigi kómektesti.
Dáýqara aýylynda Ekinshi dúniejúzilik soǵysta qaza tapqan jaýyngerlerge arnalǵan
eskertkishtiń janynda Qaiyrjan Tikshekeevtiń súiegin qaita jerleýge arnalǵan miting ótti, bozdaqtar arýaǵyna baǵyshtalyp quran oqyldy.
Jaýynger rýhyna taǵzym etý maqsatynda bir minýt únsizdik jariialanǵannan soń Qaiyrjan Tikshekeevtiń súiegi týǵan aýylyndaǵy ziratqa jerlendi.
