Ýkraina politsiiasy Kievte senbi kúni bolǵan prezident keńsesi mańyndaǵy narazylyq sharasynan soń qylmystyq is qozǵady.
Jaqynda ǵana qamaýdan shyqqan odessalyq belsendi Sergei Sternenko qaita sottalǵan soń onyń júzdegen jaqtasy prezident keńsesine keldi. Olar Sternenkony bosatýdy talap etti. Jinalǵandardyń bir bóligi ǵimarattyń fasadyna bilik pen politsiiany qorlaityn jazýlar men graffiti salǵan. Ǵimarattyń terezesin shaǵyp, órtemek boldy. Politsiia narazylardy syrttai baqylap turdy. Tek bir adam ustaldy.
Azattyqtyń Ýkrain qyzmeti oqiǵa ornynan fotogalereia jariialady.
IIM men Ýkraina prezidentiniń keńsesi narazylyqqa shyqqandardyń áreketin synady. IIM orynbasary Anton Gerashenko "aktsiia qatysýshylary politsiiany arandatyp, qan tógýdi oilady, biraq politseiler oǵan aralaspady" dedi. Onyń sózinshe, ondaǵan adam jaýapqa tartylady. Prezident keńsesi basshysynyń keńesshisi Maksim Podoliak "prezident Vladimir Zelenskii narazylyqqa kedergi jasaýǵa negiz kórmedi, al vandalizm kesirinen qiraǵan ǵimarat bólikteri qalypqa keltiriledi" dedi.
"Ýkrainskaia pravda" basylymynyń habarlaýynsha, politsiia narazylyqty "buzaqylyq" degen. Aldyn ala esep boiynsha, ǵimaratqa 2 mln griven (30 mln teńgeden asady) shyǵyn kelgen.
STERNENKO DEGEN KIM?
Aqpanda Odessa soty "Pravyi sektor" uiymynyń jergilikti bólimshesiniń burynǵy lideri Sergei Sternenkony "adam urlady jáne azaptady" degen aiyppen 7 jyl 3 aiǵa túrmege qamaǵan.
Sternenko 2015 jyly birneshe adammen birigip, jergilikti keńestiń depýtaty Sergei Sherbichti ustap áketip, ony bosatý úshin 300 myń griven (4,5 mln teńgeden asady) talap etken dep aiyptalǵan. "Pravyi sektordyń" lideriniń biri ózine taǵylǵan aiypty moiyndamaidy, ol bul istiń "saiasi astary bar" dep sanaidy.
Sternenko Odessa qalasyndaǵy Evromaidan liderleriniń biri bolǵan. 2014 jyly Kievtegi Maidanǵa qatysyp, keiin Odessadaǵy "Pravyi sektordyń" bólimshesin basqardy.
2018 jyly oǵan úsh ret qastandyq jasalǵan. Birinde shabýyldaǵan adam pyshaqtalyp qaitys bolǵan. Sternenko qorǵanǵanyn aitqan. Bul isti politsiia adamdy qasaqana óltirý faktisi boiynsha tergep jatyr. Ol qolhatpen qamaýdan bosatylǵan.
Aqpanda Sternenkonyń jaqtastary prezident keńsesine kirmek bolǵan. Politsiia olarǵa kedergi keltirip, birneshe adam zardap shekken.
