Foto: facebook.com/ffin.ua
Ýkrainada qazaqstandyq kásipker Timýr Týrlovtyń kompaniiasy sanktsiiaǵa ushyrady. Bul týraly kompaniianyń baspasóz qyzmeti málimdedi, - dep habarlaidy Tengrinews.kz agenttigi.
"Ýkrainanyń baǵaly qaǵazdar jáne qor naryǵy jónindegi ulttyq komissiiasy "Fridom Finans Ýkraina" JShQ litsenziialaryn 2022 jylǵy 19 qazanda Ýkraina Prezidentiniń Jarlyǵymen Ýkrainanyń Ulttyq qaýipsizdik jáne qorǵanys keńesiniń "jeke arnaiy ekonomikalyq jáne basqa da shekteý sharalaryn qoldaný jáne olarǵa ózgerister engizý týraly" sheshimi negizinde toqtatty", - delingen habarlamada.
Litsenziialar toqtatylǵany, biraq joiylmaǵany atap ótildi.
"Bul sanktsiialardyń negizgi saldarynyń biri - klient aldyndaǵy mindettemelerdi oryndamaý. Biraq kompaniia bul shekteýlerdi qatelik dep sanap, sheshimge qarsy ekenderin bildiredi. Bizdiń qyzmetimiz jáne kompaniianyń qurylymy týraly tolyq aqparatpen barlyq instantsiialarǵa ótinishter jiberildi", - dep túsindirdi kompaniia.
Budan ári "Fridom Finans Ýkraina" JShQ Ýkrainanyń baǵaly qaǵazdar jáne qor naryǵy jónindegi ulttyq komissiiasynyń sheshimderin basshylyqqa alatyny atap ótildi.
Kompaniia ýkrainalyq investorlar "Fridom Finans Ýkraina" arqyly satyp alǵan jáne depozitarlyq mekemede saqtalǵan barlyq aktivter klientterge tolyq menshik quqyǵy negizinde tiesili dep sendirdi.
"Kompaniia múmkindiginshe klientter aldyndaǵy barlyq mindettemelerdi oryndaidy. Sanktsiialar salý Ýkrainanyń qor naryǵynyń búkil júiesi úshin kútpegen jaǵdai boldy. Biz Ýkrainada kóptegen jyldar boiy jumys istep, Ýkrainanyń qor naryǵyn, onyń ekonomikasyn, qor naryǵynyń infraqurylymyn belsendi damytyp kelemiz.
Sanktsiialar tek "Fridom Finans Ýkraina" JShQ-ǵa qatysty boldy, ol arqyly qazir klientter Ýkrainanyń qor naryǵynda baǵaly qaǵazdarmen saýda jasaidy", - dep habarlady kompaniianyń baspasóz qyzmeti.
Ýkraina azamattary áli de Freedom Finance Europe-degi shottary men aktivterine qol jetkize alady.
"Eýropalyq broker arqyly olar halyqaralyq qor birjalaryna investitsiia sala alady. Eýropalyq brokerdiń shottaryndaǵy klientterdiń barlyq qarajaty Eýroodaq zańnamasymen qorǵalǵan", - dep qorytyndylady kompaniia.
